جبل الشیخ میں بشار حکومت کا سینٹرل کمانڈ ہیڈ کوارٹر تباہ کر دیا : اسرائیل

شام میں گذشتہ ہفتے کیے گئے حملوں کے بعد اسرائیلی فوج نے اعلان کیا ہے کہ اس نے شام کی سابقہ حکومت کے زیرِ استعمال مرکزی کمانڈ ہیڈکوارٹر کو تباہ کر دیا ہے، یہ مرکز جبل الشیخ کی چوٹی پر واقع تھا۔ اسرائیلی فوج کے ترجمان اویخای ادرعی نے پیر کے روز سوشل میڈیا پلیٹ فارم "ایکس" پر ایک بیان جاری کرتے ہوئے کہا کہ جبل بریگیڈ (810) کی فورسز، جو ڈویژن 210 کے تحت کام کرتی ہیں، جنوبی شام میں اپنی کارروائیاں جاری رکھے ہوئے ہیں۔

انھوں نے بتایا کہ گذشتہ ہفتے فوج کی ان فورسز نے، جن میں پیراٹروپرز اور خصوصی انجینئرنگ یونٹ "یھلوم" شامل تھیں، جبل الشیخ کے اس علاقے میں کارروائی مکمل کی جو شامی حکومت کی ایک مخصوص فوجی یونٹ کے زیرِ نگرانی تھا۔ اس کارروائی کے دوران فوج کو وہاں پرانی شامی حکومت سے منسلک کئی طرح کی فوجی تنصیبات ملیں، جن میں اسلحے کے گودام، توپیں، راکٹ لانچر، مارٹر گولے، راکٹ شیلز، بارودی سرنگیں اور دیگر دھماکہ خیز مواد شامل تھا۔ ترجمان کے مطابق ان تمام فوجی وسائل کو یا تو ضبط کر لیا گیا یا تباہ کر دیا گیا۔

یہ کارروائی ایسے وقت میں سامنے آئی ہے جب اسرائیل نے جمعرات کے روز دمشق میں صدارتی محل کے قریب ایک مقام کو نشانہ بنایا ... اور جمعہ اور ہفتہ کی درمیانی شب پورے شم میں 20 سے زیادہ فضائی حملے کیے۔ انھیں فرانسیسی خبر رساں ادارے کے مطابق، سال کے آغاز سے اب تک کے سب سے شدید حملے قرار دیا گیا۔ اسرائیلی فوج نے ان حملوں کی تصدیق کرتے ہوئے کہا کہ ان کا ہدف دمشق اور دیگر علاقوں میں موجود شامی فوجی ڈھانچے تھے۔

اسی دوران، اسرائیلی وزیرِ اعظم بنیامین نیتن یاہو اور وزیر دفاع یسرائیل کاتز نے ایک مشترکہ بیان جاری کیا، جس میں کہا گیا کہ یہ حملے شامی حکومت کو ایک واضح پیغام ہیں کہ اسرائیل جنوبی دمشق میں شامی فوج کی کسی بھی نئی موجودگی کو یا دروز فرقے کو لاحق کسی بھی خطرے کو برداشت نہیں کرے گا۔

یہ سب کچھ ایک ایسے وقت میں ہو رہا ہے جب شام میں بشار الاسد کے بعد ایک نئی قیادت، صدر احمد الشرع، اقتدار سنبھال چکی ہے، اور اسے اسرائیل کی ان کارروائیوں سمیت کئی اندرونی و بیرونی چیلنجوں کا سامنا ہے۔ اسرائیلی افواج کی یہ پیش رفت شام کے جنوبی حصے میں اس کی عسکری موجودگی اور اثر و رسوخ کو محدود کرنے کی کوششوں کا تسلسل سمجھی جا رہی ہے۔