بحرین اور کویت میں تعینات امریکی فوجیوں کے اہل خانہ کو واپسی کی اجازت
امریکہ نے بحرین اور کویت میں تعینات اپنے فوجیوں کے اہل خانہ کو سکیورٹی خدشات کے باعث عارضی طور پر واپس بلانے کی اجازت دے دی ہے۔ ایک اعلیٰ امریکی عہدیدار نے "رائیٹرز" کو بتایا کہ یہ فیصلہ خطے میں بڑھتی ہوئی کشیدگی کے تناظر میں کیا گیا ہے۔
ادھر "ایسوسی ایٹڈ پریس" کے مطابق امریکہ نے بحرین اور کویت میں موجود اپنے غیر ضروری سفارتی عملے اور ان کے اہل خانہ کو بھی وطن واپس جانے کی اجازت دے دی ہے۔ امریکی وزیر دفاع کے ترجمان اور اعلیٰ اہلکار پیٹ ہیگستھ نے بتایا کہ مشرق وسطیٰ کے مختلف مقامات پر تعینات امریکی فوجیوں کے اہل خانہ کو رضاکارانہ طور پر واپسی کی اجازت دی گئی ہے۔
عہدیدار نے مزید کہا کہ "ہمارے فوجیوں اور ان کے اہل خانہ کی سلامتی اور تحفظ ہماری اولین ترجیح ہے۔ امریکی سینٹرل کمانڈ خطے میں کشیدگی کی صورت حال پر مسلسل نظر رکھے ہوئے ہے"۔
ان کے مطابق، سینٹرل کمانڈ امریکی وزارت خارجہ اور خطے میں موجود اتحادیوں و شراکت داروں کے ساتھ قریبی رابطے میں ہے تاکہ کسی بھی ممکنہ مشن کی فوری اور مؤثر معاونت کے لیے ہمہ وقت تیار رہا جا سکے۔
یہ امریکی اقدام ان اطلاعات کے بعد سامنے آیا ہے جن میں "العربیہ/الحدث" کو باخبر ذرائع نے بتایا کہ امریکہ نے بغداد میں اپنی سفارت خانے میں کام کرنے والے کچھ غیر ملکی لاجسٹک سپورٹ اسٹاف کو بھی واپس بلانے کا فیصلہ کیا ہے۔ یہ اقدام امریکی وزارت خارجہ کی اُس عالمی کفایت شعاری پالیسی کا حصہ ہے جس کے تحت مختلف سفارتی مشنز میں اخراجات میں کمی لائی جا رہی ہے۔
