ایران اور اس کی پراکسیزکے خلاف پورےعزم کے ساتھ کارروائی جاری رکھیں گے:نیتن یاھو

اسرائیلی وزیر اعظم بنجمن نیتن یاھو نے اس بات پر زور دیا کہ اسرائیل ایران اور اس کے کارندوں کے خلاف پورے عزم کے ساتھ کارروائی جاری رکھے گا۔

ان کے دفتر سے جاری ایک بیان میں نیتن یاھو نے کہا کہ وہ مشرق وسطیٰ اور عالمی سطح پر استحکام کے لیے خطرہ ہیں۔

نیتن یاھو نے صدر ترکیہ طیب ایردوآن پر بھی تنقید کی اور کہا کہ انہیں اسرائیل پر تنقید کرنے کا کوئی اخلاقی جواز حاصل نہیں ہے۔ یہ ردعمل صدر ترکیہ کے اس بیان کے جواب میں سامنے آیا ہے جس میں انہوں نے کہا تھا کہ اسرائیل خطے اور پوری انسانیت کے لیے خطرہ ہے۔

اس سے قبل طیب ایردوآن نے اس بات پر زور دیا تھا کہ شام اور لبنان پر اسرائیل کے حملے اس حد تک پہنچ چکے ہیں جو ان کے ملک کے لیے بھی خطرہ ہیں۔ پارلیمان سے خطاب کرتے ہوئے انہوں نے مزید کہا کہ اسرائیلی جارحیت پوری دنیا کے لیے خطرہ ہے اور اسے روکنا ضروری ہے۔

رائٹیرز کے مطابق طیب ایردوآن نے بحیرہ روم کے خطے میں عدم استحکام پیدا کرنے کے لیے اسرائیلی قیادت میں بدنیتی پر مبنی اقدامات کی موجودگی کا بھی ذکر کیا اور واضح کیا کہ ترکوں اور ترک قبرصی باشندوں کے حقوق کی خلاف ورزی کرنے والی کسی بھی کارروائی پر انقرہ کا جواب واضح اور سخت ہوگا۔

یہ پیش رفت ایسے وقت میں سامنے آئی ہے جب امریکی انتظامیہ کے ایک اعلیٰ عہدیدار نے بتایا ہے کہ فاکس نیوز کے مطابق امریکہ اور ایران کے درمیان امن مذاکرات بدھ کوجاری رہے، حالانکہ امریکی صدر ڈونلڈ ٹرمپ نے تہران پر نئے حملے کرنے کی دھمکی دی تھی۔

اپنا نام ظاہر نہ کرنے والے عہدیدار نے کہا کہ مذاکرات بدستور جاری ہیں اور واشنگٹن تہران کے ساتھ معاہدے تک پہنچنے کے لیے زیادہ سے زیادہ دباؤ ڈالنا جاری رکھے گا۔