آپریشن Rising Lion کی تفصیلات .... اسرائیل نے ایران کے قلب کو نشانہ کیسے بنایا؟

ایران اور اسرائیل نے ہفتے کی صبح سویرے ایک دوسرے پر میزائل برسائے اور فضائی حملے کیے ... جب کہ اسرائیل نے ایران کے خلاف اب تک کا سب سے بڑا حملہ کر کے اسے ایٹمی ہتھیار بنانے سے روکنے کی کوشش کی۔

اسرائیلی ذرائع کے مطابق، اس کارروائی کو "ایران کے ساتھ جاری تنازع کی تاریخ کا سب سے بڑا انٹیلی جنس حملہ" قرار دیا گیا ہے۔ اسرائیلی میڈیا سے بات کرنے والے سکیورٹی ذرائع نے بتایا کہ یہ آپریشن کئی برس کی منصوبہ بندی اور ایران کے اندر خفیہ صلاحیتوں کی پیشگی تعیناتی کا نتیجہ ہے، اور اس میں مرکزی زمینی کردار موساد کے اہل کاروں کا رہا۔

آپریشن کا آغاز چند ماہ قبل ہوا، جب کمانڈو یونٹوں کے ذریعے ایران کے اندر میزائل اسمگل کیے گئے۔ ان فورسز نے ایران کے وسطی علاقے میں زمین سے فضا میں مار کرنے والے ایرانی میزائل سسٹمز کے قریب کھلے علاقوں میں جدید گائیڈڈ ہتھیار نصب کیے۔ جیسے ہی اسرائیلی فضائی حملہ شروع ہوا، ان میزائلوں کو ایک ساتھ اپنے اہداف کی طرف داغا گیا۔

اسرائیلی حملوں میں نشانہ بننے والے ایرانی فضائی دفاعی نظاموں میں یہ شامل تھے :

SA-69

SA-71

SA-63

SA-68

ان ہتھیاروں کے ساتھ ساتھ ایک مربوط حملہ ڈرون طیاروں کے ذریعے بھی کیا گیا، جس کے لیے موساد نے ایران کے اندر، خاص طور پر تہران کے قریب، ایک خفیہ اڈا قائم کر رکھا تھا۔ حملے کے دوران وہاں سے ڈرون طیاروں کو متحرک کر کے انھیں زمین سے زمین تک مار کرنے والے میزائل لانچروں پر چھوڑا گیا۔

مزید یہ کہ بعض ایرانی کمانڈرز کی گاڑیوں کے دروازوں پر چپکنے والے بم نصب کیے گئے، جن کے دھماکوں سے کئی افسران ہلاک ہو گئے۔

اسرائیلی انٹیلی جنس ذرائع کے مطابق، ان حملوں کے دوران پاسدارانِ انقلاب کی فضائیہ کے کئی اعلیٰ افسران اس وقت ہلاک ہوئے جب وہ ایک زیرِ زمین کمانڈ سینٹر میں اجلاس میں مصروف تھے۔

اسرائیلی فوج کی جانب سے جاری بیان میں کہا گیا ہے کہ ایران میں کیے گئے فضائی حملوں سے ایرانی فضائیہ کے مغربی علاقوں، خصوصاً ہمدان میں قائم فوجی اڈے تباہ ہوئے، جب کہ تبریز کا ایک اہم فوجی اڈا مکمل طور پر تباہی سے دوچار کر دیا گیا۔

بیان کے مطابق درجنوں اہداف کو نشانہ بنایا گیا، جن میں بغیر پائلٹ کے طیارے (ڈرون) اور زمین سے زمین تک مار کرنے والے راکٹ لانچرز شامل ہیں۔