نتن یاہو غزہ پر قبضہ کریں اور 'انسانی شہر' کے منصوبے کو نافذ کریں: اسرائیلی وزیر خزانہ

اسرائیلی وزیر خزانہ بتسلئیل سموٹریچ نے کہا ہے کہ حماس کے ساتھ کسی بھی جزوی معاہدے کے دروازے کو مستقل طور پر بند کرنے کا وقت آ گیا ہے۔ انہوں نے غزہ کی پٹی پر مکمل قبضے اور انسانی شہر کے منصوبے کو نافذ کرنے کا مطالبہ کیا ہے۔

سموٹریچ نے وزیر اعظم نتن یاہو سے مطالبہ کیا کہ وہ فوج کو غزہ پر دھاوا بولنے اور انسانی علیحدگی کے منصوبے کو نافذ کرنے کا حکم دیں۔ یہ وہ منصوبہ ہے جو اسرائیلی وزیر دفاع نے تجویز کیا تھا اور اس میں تقریباً چھ لاکھ فلسطینیوں کو ایک ایسے شہر میں منتقل کرنا شامل ہے جو جنوبی غزہ میں رفح کے کھنڈرات پر قائم کیا جائے گا۔

انہوں نے پلیٹ فارم "ایکس" پر ایک پوسٹ میں کہا ہے کہ حماس کو زیر کرنے، یرغمالیوں کو بغیر کسی شرط کے رہا کرنے یا غزہ کو مکمل طور پر تباہ کرنے کے لیے انسانوں کو الگ بسانے کا منصوبہ نافذ کیا جانا چاہیے۔

گزشتہ منگل کو سموٹریچ نے اسرائیلی وزیر اعظم سے حماس کو 24 گھنٹے کی مہلت دینے کا مطالبہ کیا تھا تاکہ جنگ بندی اور قیدیوں کے تبادلے کے معاہدے پر رضامندی حاصل کی جا سکے یا مذاکرات بند کر دیے جائیں۔ انہوں نے غزہ کے شمالی حصے کو اسرائیل میں ضم کرنے کا بھی مطالبہ کیا۔

جہنم کے دروازے

دوسری جانب اسرائیلی چیف آف سٹاف ایال زامیر نے کہا ہے کہ ہم ایک ایسے دوراہے پر ہیں جو غزہ میں ہماری مہم کے تسلسل کو متاثر کر سکتا ہے۔ جبکہ اسرائیلی وزیر دفاع یسرائیل کاٹز نے کہا کہ اگر قیدیوں کو جلد رہا نہ کیا گیا تو غزہ میں جہنم کے دروازے کھل جائیں گے۔

حماس کا جواب اور ترامیم

حماس نے ثالثوں کو غزہ کی پٹی میں جنگ بندی کی تجویز پر اپنا جواب دے دیا ہے جس میں اسرائیل کے ساتھ مستقل جنگ بندی کی ضمانتوں سمیت ترامیم شامل ہیں۔ بدھ کو دونوں فریقوں کے درمیان مذاکرات سے باخبر دو فلسطینی ذرائع نے اس کی تصدیق کی۔

ایک ذریعے نے بتایا کہ حماس اور مزاحمتی دھڑوں نے بدھ کو ثالثوں کو پیش کردہ تجویز پر اپنا جواب دے دیا ہے جس میں مستقل جنگ بندی تک پہنچنے کے لیے ترامیم شامل ہیں۔ انہوں نے مزید کہا کہ حماس کا جواب بنیادی طور پر غزہ کی پٹی میں امداد کے داخلے، غزہ کی پٹی سے اسرائیلی فوجی انخلا کے نقشے اور جنگ کے مستقل خاتمے کی ضمانتوں سے متعلق ہے۔

یہ سب اس وقت ہو رہا ہے جب حماس اور اسرائیل کے وفود مسلسل تیسرے ہفتے دوحہ میں بالواسطہ مذاکرات جاری رکھے ہوئے ہیں۔ ان مذاکرات کا مقصد 21 ماہ کی تباہ کن جنگ کے بعد جنگ بندی کے معاہدے تک پہنچنا ہے۔ یہ جنگ 7 اکتوبر 2023 کو حماس کے اسرائیل پر حملے کے بعد شروع ہوئی تھی۔