سعودی عرب کے جنرل ڈائریکٹوریٹ آف نارکوٹکس کنٹرول (جی ڈی این سی) نے 89,760 ایمفیٹامین گولیوں کی سمگلنگ کی کوشش ناکام بنانے میں متحدہ عرب امارات کے حکام کی مدد کی ہے، وزارتِ داخلہ کے سیکیورٹی ترجمان نے اتوار کو کہا۔
بریگیڈیئر جنرل طلال بن شلہوب نے سعودی پریس ایجنسی (ایس پی اے) کے جاری کردہ ایک بیان میں کہا کہ ممنوعہ ادویات کو کپڑوں کی ایک کھیپ میں چھپایا گیا تھا۔
شلہوب نے کہا کہ منشیات کی سمگلنگ میں ملوث مجرمانہ نیٹ ورکس کی فعال نگرانی کے ساتھ ساتھ جی ڈی این سی کی فراہم کردہ معلومات اس کارروائی کی کامیابی کا باعث بنیں۔
ہفتے کے روز سعودی حکام نے کہا کہ مملکت میں زمینی، ہوائی اور سمندری بندرگاہوں پر کسٹمز کی کارروائیوں میں ایک ہفتے میں ممنوعہ اشیاء کی ضبطی کی 1,371 کارروائیاں ہوئیں۔
زکوٰۃ، ٹیکس اور کسٹمز اتھارٹی (زیڈ اے ٹی سی اے) نے کہا کہ منشیات مثلاً چرس، کوکین، ہیروئن، شبو اور کیپٹاگون گولیوں کے 47 کیسز اور دیگر ممنوعہ اشیاء کے 333 کیسز شامل تھے۔
ایس پی اے نے ایک علیحدہ رپورٹ میں کہا کہ کسٹمز حکام نے تمباکو اور اس سے تیارشدہ اشیاء کی سمگلنگ کے 1,046 سے زیادہ، رقم کی منتقلی سے متعلق 15 اور تین ایسے واقعات روکے جن میں ہتھیار اور ان کے لوازمات شامل تھے۔
زیڈ اے ٹی سی اے نے عوام سے مطالبہ کیا کہ وہ نامزد ہاٹ لائن 1910 یا [email protected] پر ای میل یا بین الاقوامی نمبر 009661910 پر کال کر کے سمگلنگ کی سرگرمیوں کی اطلاع دیں اور ادارے کی کوششوں میں معاونت کریں۔
زیڈ اے ٹی سی اےنے عوام کو یقین دلایا کہ تمام اطلاعات کو صیغۂ راز میں رکھا جائے گا۔ اس نے درست معلومات کے لیے مالی انعامات کی بھی پیشکش کی۔
