منتظمین نے بتایا کہ 10 جہازوں کا ایک قافلہ ہفتے کے روز جنوبی اٹلی کے شہر سسلی سے غزہ کے لیے روانہ ہو گیا جس میں 60 افراد بشمول نو ممالک کے منتخب عہدیداران بھی سوار ہیں۔
فریڈم فلوٹیلا کولیشن (ایف ایف سی) اور تھاؤزنڈ میڈلینز ٹو غزہ (ٹی ایم ٹی جی) نے ایک بیان میں کہا ہے کہ وہ فلسطینی سرزمین تک امداد پہنچانے کے لیے "غیر قانونی اسرائیلی ناکہ بندی توڑنے" کا ارادہ رکھتے ہیں۔
انہوں نے مزید کہا، "ہماری کشتیاں زیادہ تر طبی سامان، خشک خوراک اور سکول کا سامان لے جا رہی ہیں کیونکہ فلسطینیوں کی سب سے بڑی ترجیحی ضروریات میں یہی چیزیں شامل ہیں۔"
یہ کشتیاں عالمی صمود فلوٹیلا میں شامل ہونے کا ارادہ رکھتی ہیں۔
کشتیوں میں یورپی پارلیمنٹ اور بیلجیئم، فرانس، آئرلینڈ، سپین اور امریکہ کے منتخب عہدیداران بھی سوار ہیں۔
بدھ کے روز اقوامِ متحدہ نے یونان کے قریب گلوبل صمود فلوٹیلا پر مبینہ ڈرون حملوں کی تحقیقات کا مطالبہ کیا جس کا الزام کارکنان نے اسرائیل پر لگایا ہے۔
