اسرائیلی فوج نے کہا کہ فضائی دفاعی نظام نے بدھ کی صبح یمن سے داغے گئے میزائل کا جواب دیا۔ ایران کے حوثی اتحادیوں نے حالیہ دنوں میں اسرائیل پر حملوں کا دعویٰ کیا ہے۔
ایک فوجی بیان میں کہا گیا، اسرائیلی افواج نے "یمن سے اسرائیلی سرزمین کی طرف ایک میزائل داغنے کی نشاندہی کی ہے اور فضائی دفاعی نظام خطرے کو روکنے کے لیے کام کر رہے ہیں۔" بعد میں اعلان کیا گیا کہ رہائشیوں کو "ملک کے تمام علاقوں میں محفوظ جگہوں سے نکلنے کی اجازت دے دی گئی۔"
اسرائیلی میڈیا نے کہا ہے کہ میزائل کو ناکارہ بنا دیا گیا اور حملے میں کسی جانی یا مالی نقصان کی اطلاع نہیں ملی۔
یمن کی ایرانی حمایت یافتہ حوثی ملیشیا نے ہفتے کے آخر میں اسرائیل کو نشانہ بنانے والے میزائل اور ڈرون حملوں کی ذمہ داری قبول کی جو موجودہ جنگ میں ان کا پہلا حملہ ہے۔
اسرائیلی فوج نے پیر کو یہ بھی کہا کہ یمن سے داغے گئے دو ڈرونز روک لیے گئے۔
یمن سے حوثی ممکنہ طور پر بحیرۂ احمر کے ذریعے جہاز رانی میں خلل پیدا کر سکتے ہیں جیسا کہ انہوں نے غزہ پر اسرائیل کی جنگ کے دوران کیا تھا۔
حوثی قبل ازیں بحیرۂ احمر اور نہر سویز کے ذریعے تجارتی جہاز رانی کو روکنے کی دھمکی دے چکے ہیں جس کے لیے جہازوں کو یمن کے ساحل سے قریب ایک تنگ آبنائے سے گذرنا پڑتا ہے۔
