مشرق وسطیٰ کی صورتحال پر سعودی ولی عہد اور روسی صدر کے درمیان ٹیلیفونک رابطہ

روسی صدر ولادیمیر پوتین نے سعودی عرب کےولی عہد شہزادہ محمد بن سلمان کے ساتھ ٹیلیفونک رابطے کے دوران مشرق وسطیٰ میں جاری جنگ کے خاتمے کے لیے سیاسی اور سفارتی کوششوں کو تیز کرنے پر زور دیا ہے۔

کریملن کی جانب سے جاری کردہ ایک بیان میں بتایا گیا ہے کہ دونوں رہنماؤں نے دشمنی کے خاتمے اور تنازعے کے طویل مدتی حل تک پہنچنے کے لیے سیاسی و سفارتی کوششوں کو مزید موثر بنانے کی ضرورت کی توثیق کی۔

یہ اہم رابطہ ایک ایسے وقت میں ہوا ہے جب یوکرین نے سعودی عرب اور دیگر خلیجی ممالک کے ساتھ فضائی دفاع کے شعبے میں معاہدے کیے ہیں تاکہ خطے کے ممالک کو ان ایرانی ڈرون حملوں سے بچایا جا سکے جن کا سامنا تہران پر امریکی اسرائیلی حملوں کے آغاز کے بعد سے کیا جا رہا ہے۔

کریملن کے مطابق سعودی ولی عہد اور روسی صدر نے گفتگو کے دوران مشرق وسطیٰ میں عسکری اور سیاسی صورتحال کی ابتری پر گہری تشویش کا اظہار کیا۔

روسی صدارتی محل کے بیان میں کہا گیا ہے کہ مشرق وسطیٰ کے بحران سے متعلق تمام پہلوؤں کا جامع جائزہ لیا گیا اور خطے میں سکیورٹی کی بگڑتی ہوئی صورتحال، عام شہریوں کے جانی نقصان اور تزویراتی اہمیت کے حامل بنیادی ڈھانچے کی تباہی پر گہری تشویش ظاہر کی گئی۔

بیان میں روس اور سعودی عرب کے درمیان مختلف شعبوں میں جاری تعاون کی اعلیٰ سطح پر اطمینان کا اظہار کیا گیا جو دوستانہ اور باہمی مفاد کے تحت آگے بڑھ رہا ہے۔

بیان میں کہا گیا ہے کہ حالیہ بحران کی وجہ سے توانائی کی پیداوار اور نقل و حمل میں پیدا ہونے والی رکاوٹیں عالمی توانائی کی سکیورٹی پر منفی اثرات مرتب کر رہی ہیں۔ اس سلسلے میں تیل کی عالمی منڈی کے استحکام کو یقینی بنانے کے لیے روس اور سعودی عرب کی اوپیک پلس کے فریم ورک کے تحت مشترکہ جدوجہد کی اہمیت پر زور دیا گیا۔