لبنانی وزیراعظم نواف سلام نے اسرائیل اور حزب اللہ کے درمیان جنگ کے آغاز سے اب تک لبنان پر ہونے والے غیر معمولی اسرائیلی حملوں کے نتیجے میں جاں بحق ہونے والوں کی یاد میں جمعرات کو ملک بھر میں یومِ سوگ کا اعلان کیا ہے۔ بدھ کے روز ہونے والے ان حملوں میں سو سے زائد افراد جاں بحق اور سیکڑوں زخمی ہوئے ہیں۔
وزیراعظم ہاؤس سے جاری بیان کے مطابق ان حملوں میں نہتے اور پُر امن شہریوں کو نشانہ بنایا گیا ہے، جس کے باعث جمعرات کے روز تمام سرکاری ادارے، بلدیات اور تعلیمی ادارے بند رہیں گے اور قومی پرچم سرنگوں رہے گا۔ وزیراعظم نواف سلام اسرائیلی قتل و غارت کو رکوانے کے لیے عرب برادران اور عالمی حکام کے ساتھ مسلسل رابطے میں ہیں تاکہ لبنان کی سیاسی اور سفارتی طاقت کو متحرک کیا جا سکے۔
لبنانی ایوانِ صدر نے بدھ کے روز اپنے بیان میں کہا کہ اسرائیل نے ایک نیا قتلِ عام کر کے بین الاقوامی قوانین اور روایات کی دھجیاں اڑا دی ہیں۔ بیان میں کہا گیا کہ ان وحشیانہ حملوں نے ایک بار پھر ثابت کر دیا ہے کہ اسرائیل کسی معاہدے یا عہد کا احترام نہیں کرتا۔ دشمن نے گذشتہ 15 ماہ سے جاری جنگ بندی کے معاہدے کی مسلسل خلاف ورزی کی ہے اور اب انسانی اقدار کو چیلنج کرتے ہوئے ایک نیا خونی باب رقم کیا ہے۔ ایوانِ صدر نے عالمی برادری سے مطالبہ کیا ہے کہ وہ اپنی ذمہ داری پوری کرے اور خطے کے استحکام کو خطرے میں ڈالنے والے اس جارحانہ رویے کا خاتمہ کرے۔
لبنانی وزیر صحت رکان ناصر الدین نے تصدیق کی ہے کہ ملک بھر میں ہونے والے وسیع پیمانے کے اسرائیلی حملوں میں سیکڑوں افراد جاں بحق اور زخمی ہو چکے ہیں۔ لبنانی ہلالِ احمر کی 100 سے زائد ایمبولینسیں متاثرہ علاقوں میں امدادی کارروائیوں اور زخمیوں کی اسپتالوں میں منتقلی میں مصروف ہیں۔ بیروت کے فائر بریگیڈ نے بھی شہریوں سے اپیل کی ہے کہ وہ ریسکیو آپریشن میں تعاون کریں۔
دوسری جانب اسرائیلی فوج نے دعویٰ کیا ہے کہ اس نے لبنان میں اب تک کی سب سے بڑی مربوط فضائی کارروائی کی ہے، جس کے دوران محض 10 منٹ کے اندر بیروت، بقاع اور جنوبی لبنان میں حزب اللہ تنظیم کے 100 سے زائد مراکز، فوجی ٹھکانوں اور کمانڈ سینٹرز کو نشانہ بنایا گیا ہے۔
