اسرائیلی فوج نے جنوبی لبنان کے سات دیہات خالی کرنے کا حکم دے دیا

اسرائیلی فوج نے اتوار کے روز جنوبی لبنان کے سات دیہات خالی کرنے کا حکم دیتے ہوئے کہا ہے کہ وہ حزب اللہ کی جانب سے دونوں ممالک کے حالیہ جنگ بندی معاہدے کی خلاف ورزیوں کا جواب دے گی۔

فوج کے عربی زبان کے ترجمان کرنل افیخائے ادرعی نے دریائے لیطانی کے جنوب میں سات دیہات کا نام لیتے ہوئے ایکس پر کہا، "دہشت گرد تنظیم حزب اللہ کی جنگ بندی معاہدے کی خلاف ورزی کے پیشِ نظر اسرائیلی دفاعی افواج اس کے خلاف فیصلہ کن کارروائی کرنے پر مجبور ہیں۔"

وزیرِ اعظم بنجمن نیتن یاہو نے اتوار کے روز کہا ہے کہ لبنان میں حزب اللہ کے اقدامات جنگ بندی کو "تباہ" کر رہے ہیں۔

نیتن یاہو نے کابینہ کے ہفتہ وار اجلاس کے دوران کہا، "یہ بات بہت اہم ہے کہ حزب اللہ کی خلاف ورزیاں عملاً جنگ بندی ختم کر رہی ہیں۔"