قاہرہ میں سفارتی نمائندگی کی معاملہ اولین ترجیح ہے: دمشق

ایک شامی سفارتی ذریعے نے "العربیہ" کے لیے اس بات کی تصدیق کی ہے کہ دمشق مصر کے ساتھ تعلقات کو مضبوط اور فروغ دینے کا خواہاں ہے۔

انہوں نے کہا کہ قاہرہ میں سفارتی نمائندگی کے معاملے کو شامی فریق کے ہاں اولین ترجیح حاصل ہے۔

سفارتی عہدیدار نے واضح کیا کہ شام مصر کے ساتھ تعلقات کو برادرانہ اور سٹریٹجک تعلقات کے طور پر دیکھتا ہے۔ ان تعلقات کی بنیاد دونوں ملکوں کے درمیان باہمی دلچسپی کے مختلف علاقائی امور میں ہم آہنگی کی اہمیت پر ہے۔

انہوں نے مزید کہا کہ دمشق نے اس سے قبل شامی وزارت خارجہ میں عرب امور کے ڈائریکٹر ڈاکٹر محمد الاحمد کو قاہرہ میں اپنی نمائندگی کے لیے نامزد کیا تھا کیونکہ وہ سفارتی تجربہ اور اہلیت رکھتے ہیں تاہم اسے ریاستوں کے مابین معمول کی سفارتی مشاورت کے فریم ورک کے اندر اس نامزدگی پر مصری فریق کی جانب سے تحفظات موصول ہوئے تھے۔

مثبت رویہ

سفارتی ذریعے نے بتایا کہ شام نے دمشق میں مصری سفارتی نمائندے کی تعیناتی کے طریقہ کار کے ساتھ مثبت رویہ اپنایا، مصری امیدوار کی سرکاری منظوری لگ بھگ دس دن پہلے جاری کی گئی تھی اور منظور شدہ پروٹوکول کے اقدامات مکمل ہونے کے بعد مصری فریق کو اس سے آگاہ کر دیا گیا تھا۔

اس تناظر میں ذریعے نے انکشاف کیا کہ دمشق نے قاہرہ کے اپنے حالیہ وفد کے دورے کے دوران مصر میں شام کی نمائندگی کے لیے ایک اعلیٰ سطح کی سفارتی اہلکار کی نئی نامزدگی پیش کی ہے۔ اس نامزدگی کا مقصد دونوں ملکوں کے درمیان سفارتی نمائندگی کے طریقہ کار کو مکمل کرنا ہے۔

شامی ذریعے نے مزید کہا کہ ان کا ملک مصر کے ساتھ ایسی بات چیت کے ذرائع کو جاری رکھنے کا خواہاں ہے جو دونوں ملکوں اور عوام کے مفادات کے لیے سازگار ہو اور موجودہ چیلنجز کے سامنے عرب تعاون اور یکجہتی کو فروغ دینے میں مددگار ثابت ہو۔ ذریعے نے مزید کہا کہ دمشق قاہرہ کے ساتھ تعلقات کو فروغ دینے کو ایک اہم ترجیح کے طور پر دیکھتا ہے۔ امید ہے کہ آنے والے مرحلے کے دوران دونوں فریقوں کے درمیان ہم آہنگی اور رابطہ جاری رہے گا۔