میرے دورِ حکومت میں ایران جوہری ہتھیار ہرگز حاصل نہیں کر سکے گا: نیتن یاہو

امریکہ کے صدر کی جانب سے مشرق وسطیٰ میں جنگ ختم کرنے کے لیے تہران کے ساتھ معاہدے پر بات کیے جانے کے اگلے ہی روز، اسرائیلی وزیر اعظم بنیامین نیتن یاہو نے دو ٹوک الفاظ میں باور کرایا ہے کہ ان کے دورِ حکومت میں ایران کبھی جوہری ہتھیار حاصل نہیں کرے گا۔ اسرائیلی وزیر اعظم نے کسی بھی صورت میں ایران کو جوہری صلاحیتیں حاصل کرنے سے روکنے کے اپنے عزم کا اعادہ کیا۔

نیتن یاہو نے آج جمعے کے روز جاری ایک بیان میں کہا کہ جب تک میں اسرائیل کا وزیر اعظم ہوں، ایران جوہری ہتھیار حاصل نہیں کرے گا۔

انہوں نے اس معاملے پر امریکی صدر ڈونلڈ ٹرمپ کے ساتھ اپنے اتفاق رائے کو واضح کرتے ہوئے کہا کہ میں اور صدر ٹرمپ مکمل طور پر متفق ہیں کہ ایران کو جوہری بم کا مالک نہیں ہونا چاہیے۔

نیتن یاہو نے مزید کہا کہ وہ پہلے شخص ہیں جنہوں نے 30 سال سے زائد عرصے سے ایرانی جوہری پروگرام کے خلاف کام کیا ہے... اور ان کے الفاظ میں، اگر ایسا نہ ہوتا تو ایران بہت پہلے ہی اسرائیل کو تباہ کرنے کے لیے ایٹمی بم حاصل کر چکا ہوتا۔

جمعرات کو رات گئے اسرائیل نے اعلان کیا کہ امریکہ نے اسے یقین دہانی کرائی ہے کہ ایران کے ساتھ کسی بھی مستقبل کے معاہدے میں اسرائیل کے سکیورٹی مفادات کا خیال رکھا جائے گا۔

امریکی صدر ڈونلڈ ٹرمپ نے گذشتہ روز جمعرات کو ایک بڑے تصفیے کے بارے میں بات کی تھی جس سے ایران کے ساتھ جنگ کا خاتمہ ممکن ہو گا۔ انہوں نے آنے والے دنوں میں اس کے مکمل ہونے کے امکان کا اشارہ دیا تھا۔

ٹرمپ نے کہا کہ وہ دستاویز پر دستخط کی تقریب کے جلد انعقاد کی توقع رکھتے ہیں، شاید یورپ میں جہاں ان کے نائب جے ڈی وینس موجود ہوں گے۔ تاہم ایرانی حکام نے ابھی تک کسی معاہدے تک پہنچنے کی تصدیق نہیں کی ہے۔