ایران اور خلیجی ممالک کے درمیان مصالحت کی کوششیں شروع: قطری وزیراعظم عمان پہنچ گئے

ایران اور امریکہ کے درمیان جاری تکنیکی مذاکرات کے درمیان ایک باخبر سفارتی ذریعے نے انکشاف کیا ہے کہ قطر کے وزیراعظم شیخ محمد بن عبدالرحمن بن جاسم آل ثانی نے بدھ کے روز مسقط کا دورہ کیا ہے۔ خبر رساں ایجنسی رائیٹرز کے مطابق اس دورے کا مقصد "ایران، خلیج تعاون کونسل کے ممالک اور عراق کے درمیان آبنائے ہرمز کو کھولنے اور مستقبل میں اس کے انتظام کے حوالے سے بات چیت کا عمل شروع کرنا ہے"۔

ذرائع نے واضح کیا کہ "تہران اور خلیجی ممالک کے درمیان علاقائی مصالحتی بات چیت کے لیے الگ سے منصوبے جاری ہیں"۔

ذریعے نے مزید بتایا کہ یہ مذاکرات امریکی ایرانی مذاکرات اور آبنائے ہرمز سے بارودی سرنگیں ہٹانے سے متعلق انتظامات سے الگ ہوں گے اور ان کی توجہ آبنائے ہرمز کے مستقبل کے آپریشن پر مرکوز ہوگی۔

عمان کے سلطان ہیثم بن طارق نے آج قطری وزیراعظم کے ساتھ ملاقات میں پاکستان اور قطرکی ثالثی کے ذریعے جاری امریکہ ایران مذاکرات کی پیش رفت اور بحران کے تمام پہلوؤں کا حتمی حل تلاش کرنے کے لیے کی جانے والی سفارتی کوششوں کا جائزہ لیا۔ عمانی خبر رساں ایجنسی کے مطابق سلطان عمان نے خطے میں امن و استحکام کے لیے ان کوششوں کو آگے بڑھانے اور اس سلسلے میں مشترکہ مساعی کی اہمیت پر زور دیا۔

قطری وزیراعظم نے مکالمے کے راستوں کی حمایت، رابطے کے ذرائع فراہم کرنے اور مختلف فریقوں کے درمیان نقطہ نظر کو قریب لانے میں مسقط کے مرکزی کردار کی تعریف کی۔

یہ قطری وزیراعظم کا دورہ ایران کے چیف مذاکرات کار محمد باقر قالیباف اور وزیر خارجہ عباس عراقچی کے دورہ مسقط کے بعد سامنے آیا ہے۔ یہ دورہ ایران اور امریکہ کے درمیان سوئٹزرلینڈ میں مذاکرات کے پہلے دور اور 18 جون کو مفاہمت کی یادداشت پر دستخط کے چند دن بعد ہوا ہے۔

ایران نے گذشتہ عرصے کے دوران بارہا اس بات کا اعادہ کیا ہے کہ 28 فروری کو اس کے، اسرائیل اور امریکہ کے درمیان چھڑنے والی جنگ کے بعد آبنائے ہرمز کی صورتحال پہلے جیسی نہیں رہے گی۔ اگرچہ تہران نے امریکی فریق کے ساتھ مفاہمت کی یادداشت پر دستخط کے بعد 60 دنوں تک اس اہم گزرگاہ کو بلا معاوضہ کھولنے کا عزم کیا ہے، تاہم ایران نے اس کے ساحلی ممالک کی جانب سے آبنائے ہرمز کے لیے "انتظامی خدمات یا فیس" عائد کرنے کے امکان کی طرف اشارہ کیا ہے۔

دوسری جانب مسقط نے منگل کے روز اعلان کیا کہ وہ تمام جہازوں کے لیے آبنائے ہرمز سے گزرنے کے لیے ایک عارضی بحری راہداری کے استعمال کا آپشن فراہم کر رہا ہے۔ سرکاری خبر رساں ایجنسی کے مطابق یہ اقدام آبنائے کے حوالے سے اپنی ذمہ داری، عالمی معیشت کے لیے اس کی اہمیت اور بین الاقوامی قانون کے اصولوں کے تحت کیا گیا ہے تاکہ جہاز رانی کی آزادی کو یقینی بنایا جا سکے۔ مسقط نے اس بات پر زور دیا کہ یہ عمل بغیر کسی فیس کے اور امریکہ اور ایران کے درمیان طے پانے والی مفاہمت کے نتائج کے مطابق ہے۔

حال ہی میں مسقط اور تہران نے ایک مشترکہ بیان میں آبنائے ہرمز کو بین الاقوامی جہاز رانی کے لیے ایک محفوظ اور کھلا آبی راستہ برقرار رکھنے کے عزم کا اعادہ کیا اور سمندری تحفظ، جہاز رانی کی آزادی اور علاقائی استحکام کو فروغ دینے کے لیے تعاون جاری رکھنے کی اہمیت پر زور دیا۔