کوئٹہ : مسافر بس میں بم دھماکا، بچوں سمیت 10 جاں بحق

پاکستان کے رقبے کے اعتبار سے بڑے صوبے بلوچستان کے دارالحکومت کوئٹہ میں ایک مسافر بس میں سوموار شب بم دھماکا ہوا ہے جس کے نتیجے میں دس افراد جاں بحق اور متعدد زخمی ہوگئے ہیں۔

پولیس حکام کے مطابق کوئٹہ میں سریاب روڈ پر واقع دکنی بابا چوک میں ایک بس ٹرمینل پر کھڑی مقامی روٹ پر چلنے والی ایک بس میں دھماکا ہوا ہے۔اس وقت بس میں قریبا چالیس مسافر سوار تھے۔امدادی رضاکاروں نے بتایا ہے کہ جاں بحق ہونے والوں میں دو بچے بھی شامل ہیں اور بیس سے زیادہ افراد زخمی ہوئے ہیں۔

بم دھماکے میں زخمی ہونے والے تمام افراد کو کوئٹہ کے سول اسپتال میں منتقل کردیا گیا ہے جہاں چھے کی حالت تشویش ناک بتائی جاتی ہے۔اسپتال میں ایمرجنسی نافذ کردی گئی ہے۔ واقعے کے فوری بعد سکیورٹی فورسز نے پورے علاقے کا محاصرہ کر لیا ہے اورسریاب روڈ پر ٹریفک کو عارضی طور پر معطل کردیا گیا ہے۔

وزیراعلیٰ بلوچستان ڈاکٹرعبدالمالک بلوچ نے مسافر بس میں اس بم دھماکے کی شدید مذمت کی ہے اور اس واقعے کو صوبے میں پائیدار امن کے خلاف ایک سازش قراردیا ہے۔