پاکستان سے 25 نوجوان موٹر بائیکس پر حجاز مقدس کے منفرد سفر پر روانہ

پاکستان کے شہر لاہور سے 25 موٹر سائیکل سوار نوجوان عمرہ ادائی اور زیارات مقدسہ کی خاطر سعودی عرب کے منفرد سفر پر روانہ ہو گئے۔ اس کاوش کو بعض حلقے ’مذہبی سیاحت‘ سے تعبیر کر رہے ہیں۔

مقامی ذرائع ابلاغ کے مطابق نوجوانوں کا یہ گروپ حجاز مقدس کے منفرد سفر پر لاہور کے قذافی اسٹیڈیم سے روانہ ہوا۔ ٹورازم ڈیولپمنٹ کارپوریشن آف پاکستان [ٹی ڈی سی پی] کے حکام اور ایرانی خانہ فرہنگ کے عہدیداروں نے گروپ کو الوداع کہا۔

ٹی ڈی سی پی کے مطابق موٹر سائیکل سوار نوجوان 60 دن میں سعودی عرب پہنچیں گے۔ موٹر سائیکل سوار پاکستانی نوجوان پاکستان سے سعودی عرب پہنچنے سے پہلے ایران، امارات، کویت، اردن اور عراق سے گزریں گے۔

حکام کے مطابق اس سفر میں 14ہزار کلومیٹر کی مسافت طے کر کے دنیا کو محبت، اخوت اور امن کا پیغام دیں گے۔

موٹر سائیکل سوار نوجوان جن ممالک سے گزریں گے وہاں پاکستان سے بھائی چارگی کا پیغام پہنچائیں گے۔ محکمہ سیاحت ذرائع نے مزید بتایا کہ سعودی عرب پہنچنے پر پاکستان نوجوان مقدس مقامات کی زیارت کریں گے۔