11 فروری کو عام انتخابات منعقد ہو جائیں گے: الیکشن کمیشن کا سپریم کورٹ میں جواب

الیکشن کمیشن آف پاکستان نے سپریم کورٹ میں عام انتخابات کے 90 روز میں کرانے کے لیے دائر درخواستوں کی سماعت کے دوران جواب دیا ہے کہ عام انتخابات 11 فروری تک ہو جائیں گے۔

ان درخواستوں کی سماعت چیف جسٹس آف پاکستان جسٹس قاضی فائز عیسیٰ کی سربراہی میں جسٹس اطہر من اللہ اور جسٹس امین الدین خان پر مشتمل تین رکنی بینچ کر رہا ہے۔

سماعت کے دوران وکیل الیکشن کمیشن نے بتایا کہ 29 جنوری کو حلقہ بندیوں سمیت تمام انتظامات مکمل ہو جائیں گے اور 11 فروری کو ملک بھر میں انتخابات ہوں گے۔

چیف جسٹس نے ہدایت کی کہ الیکشن کمیشن آج صدر سے مشاورت کرے۔