سعودی عرب سے 11410 سے زائد پاکستانی عازمینِ حج وطن واپس پہنچ گئے
فلائٹ آپریشن دس جولائی تک ختم ہونے کی توقع
ملک کی وزارتِ مذہبی نے اتوار کے روز کہا ہے کہ بعد از حج فلائٹ آپریشن میں اب تک کل 11,418 پاکستانی عازمین واپس آ چکے ہیں۔
پاکستان میں بعد از حج فلائٹ آپریشن 11 جون کو پی آئی اے کی پرواز پی کے-732 کی اسلام آباد آمد کے ساتھ شروع ہوا جس میں 307 عازمینِ حج تھے۔ ملک میں 10 جولائی کو آپریشن کے اختتام کی توقع ہے جب آخری پرواز عازمین حج کو لے کر اسلام آباد پہنچے گی۔
پاکستان کی وزارتِ مذہبی امور و بین المذاہب ہم آہنگی کے ترجمان نے ایک بیان میں کہا، "14 جون تک کل 11,418 عازمین وطن واپس پہنچ چکے ہیں۔ 15 جون کو مزید 4,995 عازمین 20 پروازوں کے ذریعے وطن واپس پہنچیں گے۔"
ترجمان نے کہا کہ عازمینِ حج کو لانے والی چھے پروازیں اسلام آباد اور لاہور میں اتریں گی جبکہ چار پروازیں کراچی، تین ملتان اور ایک اتوار کو کوئٹہ پہنچے گی۔
بیس پروازوں میں سے آٹھ حکومت کے زیرِ انتظام پاکستان انٹرنیشنل ایئرلائنز، پانچ سعودیہ، چار ایئر بلیو، دو ایئرسیال اور ایک سیرین ایئر کی ہوں گی۔
"عالمی فضائی ٹریفک میں رد و بدل کے باوجود پاکستان کا بعد از حج فلائٹ آپریشن کامیابی سے جاری ہے،" وزارت نے ایران-اسرائیل تنازعہ کی وجہ سے پروازوں کی حالیہ تبدیلی کا حوالہ دیتے ہوئے کہا۔
ترجمان نے پاکستانی زائرین کو مشورہ دیا کہ وہ نظم و ضبط برقرار رکھتے ہوئے واپسی کے سفر کا "ہموار" رہنا یقینی بنائیں۔
انہوں نے حجاج کرام کو سعودی عرب میں اپنے متعلقہ ایئرپورٹس پر روانگی سے چھے سے آٹھ گھنٹے قبل پہنچنے کا مشورہ دیتے ہوئے کہا، "حجاج کرام اپنے سامان کا وزن ہوائی ٹکٹوں میں بیان کردہ حد کے مطابق یقینی بنائیں۔"
