یوکرین میں روسی طیارے کو مار گرانے اور زخمی پائلٹ کی ویڈیو جاری

ذرائع ابلاغ اور سوشل میڈیا پر وائرل ہونے والی ایک ویڈیو میں یوکرین میں روسی فوج کے ایک جنگی طیارے کو مار گرائے جانے کےبعد اس کے زخمی پائلٹ کو دکھایا گیا ہے۔

اطلاعات کے مطابق ہفتے کے روزملک کے شمال میں واقع شہر چرنیہیو کی فضائی حدود میں یوکرین کے دفاعی دستوں نے روسی فوج کے ایک طیارے کو مار گرایا اور اس کے پائلٹ کو زخمی حالت میں پکڑ لیا۔ پائلٹ کو لہو لہان دیکھا جا سکتا ہے۔

فوجی امور کی ویب سائٹس نے اطلاع دی ہے کہ Su-34 طیارے کو اس وقت مار گرایا گیا جب وہ روسی افواج کی طرف سے شروع کیے گئے کئی فضائی حملوں میں سے ایک کو روکنے کی کوشش کر رہا تھا۔

دیگر تصاویر سے پتہ چلتا ہے کہ دو پائلٹ پیراشوٹ کے ذریعے طیارے سے باہر نکل رہے ہیں۔ ان میں سے ایک کو پکڑ لیا جاتا ہے جب کہ دوسرا زمین پر گر کر ہلاک ہوجاتا ہے۔

Su-34 ایک خصوصی زمینی حملہ کرنے والا طیارہ ہے جو متعدد خودکار دفاعی نظاموں اور اعلیٰ برداشت کی صلاحیت سے لیس ہے۔

روسی فضائیہ کو 24 فروری کو فوجی آپریشن کے آغاز کے بعد سے کئی طیاروں کا نقصان اٹھانا پڑا ہے۔ اب تک روس کے کم از کم 2 یا 3 Su-25 طیارے اور ایک Mil Mi-24/35 ہیلی کاپٹر کو تباہ کیا جا چکا ہے۔

قابل ذکر ہے کہ 24 فروری کو ماسکو نے مغربی پڑوسی ملک یوکرین کی سرزمین پر بڑے پیمانے پر فوجی آپریشن شروع کیا تھا۔ روس کہنا تھا کہ یوکرین کو اپنے ہتھیاروں میں کمی لانا ہوگی کیونکہ کیف کے پاس موجود ہتھیار ماسکو کے لیے خطرے کا باعث بن سکتے ہیں۔ کریملن نے بھی بارہا مشرقی یورپ میں نیٹو کی توسیع کو روکنے کا مطالبہ کیا ہے اور کیف کو شامل کرنے سے روکنے کی کوشش کی ہے۔