"ایران کو اسرائیلی تباہی کا الہیانہ مینڈیٹ حاصل ہے"

پاسداران انقلاب میں مرشد اعلی علی خامنہ ای کے نمائندہ خصوصی مجبتی ذوالنور نے کہا ہے کہ " اللہ نے ایران کی اسلامی جمہوری حکومت کو اسرائیل تباہ کرنے کی خصوصی اجازت دے رکھی ہے۔

ایرانی سیاستدانوں اور فوجی عہدیداروں کی جانب سے اسرائیل کو تباہ کرنے کی یہ پہلی کال نہیں کیونکہ 1979ء سے خمینی انقلاب کے بعد سے ایرانی حکومت نے 'اسرائیل کو صفحہ ہستی سے مٹانے' کا نعرہ بلند کر رکھا ہے۔

انقلاب کے چھتیس برس گذرنے کے بعد بھی متعدد حلقوں کی رائے میں ایسے بودے نعروں نے صہیونی ریاست کے حق میں مغربی رائے عامہ ہموار کرنے کے ضمن میں بہت زیادہ کام کیا ہے۔

بعض تبصرہ نگار اس سے بھی دور کی کوڑی لائے ہیں، ان کی رائے میں اسرائیل اور ایران کے درمیان ایسی نعرہ بازی محض دکھاوا ہے کیونکہ 1980 سے اسرائیل کے ایرانی حکومت کے ساتھ خفیہ سیاسی، فوجی اور معاشی روابط ہیں۔ یہ وہ وقت ہے جب ایران نے عراق کے ساتھ لڑائی کے دوران اسرائیل سے فوجی ساز و سامان خریدا، یہ اقدام میڈیا میں ایران گیٹ کے نام سے مشہور ہے۔

پاسداران انقلاب کی ہم خیال نیوز ایجنسی 'فارس' کے مطابق مجبتی ذوالنور کا مزید کہنا تھا کہ "قرآن کریم اسلامی جہموریہ ایران کو اس بات کا مینڈیٹ عطا کرتا ہے کہ وہ اسرائیل کو صفحہ ہستی سے مٹا دے۔" خامنہ ای کے مشیر خصوصی نے اشارتا اس رائے کا بھی اظہار کیا کہ "تہران کی اپنے نیوکلیئر پروگرام میں دی گئی رعایتوں کا مطلب یہ نہیں کہ ایران اسرائیل کو صفحہ ہستی سے مٹانے سے عزم سے دست بردار ہونے جا رہا ہے۔

تین دہایئوں سے ایرانی حکومت 'القدس کا راستہ کربلاء سے ہو کر گذرتا ہے' جیسے نعرے بلند کرتی رہی ہے تاہم اب تہران نے حال ہی میں اس نعرے میں کچھ ایسے ترمیم کی ہے کہ جس سے اس کا مقصد تو برقرار رہا ہے تاہم اس میں مقامات تبدیل کرتے ہوئے نیا نعرہ تشکیل دیا ہے کہ "القدس کا راستہ مکہ اور مدینہ' سے ہو کر گزرتا ہے۔ یہ بات پاسداران انقلاب کے تھنک ٹینک عمار اسٹرٹیجک سے وابستہ مذہبی پیشوا اور رہنما علی رضا بناھیان نے کہی ہے۔

مبصرین کی رائے میں یمن میں سعودی قیادت میں جاری 'فیصلہ کن طوفان' سے پہنچنے والے صدمے کا غم غلط کرنے کے لئے تہران، ریاض کو ایسے نعروں کے ذریعے اشتعال دلانا چاہتا ہے۔ تہران کے ایسے اقدامات عرب ملکوں کو تباہ کرنے کی اسرائیلی پالیسی سے مکمل طور پر ہم آہنگ ہیں، یہی وجہ ہے کہ اس مقصد کی تکمیل کی راہ ہموار کرنے والے نعروں کو فروغ دیا جا رہا ہے۔