حاملہ خواتین کے لیے ہوائی اڈوں پر کون سی سہولیات مختص ہیں اور ان سے استفادہ کیسے ممکن ہے

حمل کے دوران فضائی سفر ایک تھکا دینے والا تجربہ معلوم ہو سکتا ہے، لیکن بہت سی خواتین اس حقیقت سے ناواقف ہیں کہ کچھ ایئرپورٹس اور ایئر لائنز ایسی سہولیات فراہم کرتی ہیں جو ان کے سفر کو زیادہ آرام دہ بنا سکتی ہیں۔ یہ سہولیات انتظار کے وقت کو کم کرنے سے لے کر ایئرپورٹ کے اندر نقل و حرکت میں مدد تک محیط ہیں۔

تاہم یورو نیوز کی ایک رپورٹ کے مطابق سفری ماہرین اس بات پر زور دیتے ہیں کہ یہ سہولیات پوری دنیا میں یکساں نہیں ہیں، بلکہ ہر ایئرپورٹ اور ایئر لائن کی پالیسی مختلف ہوتی ہے۔ اس لیے ٹکٹ بک کروانے سے پہلے ایئر لائن کی پالیسی کو جاننا ٹکٹ بکنگ جتنا ہی اہم ہے۔

تیز تر راستے

حاملہ خواتین کے لیے دستیاب سب سے اہم سہولیات میں سے ایک سفر کے طریقہ کار کو مکمل کرتے وقت یا سکیورٹی چیکنگ کے دوران ترجیحی راستوں (Priority Lanes) کا استعمال ہے۔

کئی یورپی ایئرپورٹس پر حاملہ خواتین کو خاندانوں کے لیے مختص راستوں یا فاسٹ ٹریکس کے استعمال کی اجازت دی جاتی ہے تاکہ انہیں طویل انتظار سے بچایا جا سکے۔ کچھ ایئر لائنز انہیں بزنس کلاس کے کاؤنٹرز استعمال کرنے کی سہولت بھی دیتی ہیں، چاہے ان کا ٹکٹ اکانومی کلاس کا ہی کیوں نہ ہو۔ چونکہ یہ سہولت ایئرپورٹ اور ایئر لائن کے لحاظ سے مختلف ہوتی ہے، اس لیے قطاروں میں کھڑے ہونے سے پہلے ان کے بارے میں پوچھ لینا بہتر ہے۔

ترجیحی بورڈنگ

کچھ ایئر لائنز حاملہ خواتین کو طیارے میں سوار ہونے میں ترجیح دیتی ہیں۔ اس سے انہیں اپنی نشست تک پہنچنے اور ہجوم سے دور اپنا سامان ترتیب دینے کے لیے اضافی وقت مل جاتا ہے۔

اگرچہ یہ تمام ایئر لائنز کی اعلانیہ پالیسی نہیں ہے، لیکن سفری ماہرین کا مشورہ ہے کہ بورڈنگ گیٹ پر اس کی درخواست ضرور کرنی چاہیے، خاص طور پر اگر حاملہ خاتون تھکن محسوس کر رہی ہوں یا انہیں چلنے پھرنے میں دشواری ہو۔

خصوصی مدد

یہ سہولیات صرف بورڈنگ تک محدود نہیں ہیں۔ اگر حاملہ خاتون کو شدید درد ہو یا چلنے پھرنے میں دشواری ہو یا طبی پیچیدگیاں ہوں تو وہ ایئرپورٹ کے اندر نقل و حرکت کے لیے مدد مانگ سکتی ہیں۔

کچھ ایئرپورٹس پر اس سروس میں مسافر کو ایک گیٹ سے دوسرے گیٹ تک پہنچانے کے لیے وہیل چیئر یا الیکٹرک کار فراہم کرنا شامل ہے۔ البتہ یہ سہولت صرف حاملہ ہونے کی بنیاد پر خود بخود نہیں ملتی بلکہ یہ صحت کی حالت کے مطابق اور ایئر لائن کے ساتھ پیشگی رابطے سے ممکن ہوتی ہے۔ اسے سفر سے کم از کم 48 گھنٹے پہلے طلب کرنا بہتر ہے۔

طبی رپورٹ

عام طور پر زیادہ تر ایئر لائنز حمل کے 28 ویں ہفتے تک طبی رپورٹ کے بغیر سفر کی اجازت دیتی ہیں۔ اس کے بعد بہت سی ایئر لائنز ڈاکٹر کا سرٹیفکیٹ مانگتی ہیں جس میں حمل کی مدت، اس کے معمول کے مطابق ہونے اور متوقع تاریخ پیدائش درج ہو۔

کچھ کمپنیاں حمل کے آخری ہفتوں میں سفر پر پابندیاں بھی عائد کرتی ہیں۔ عام طور پر ایک بچے کے حمل میں 36 ویں ہفتے کے بعد اور جڑواں یا اس سے زائد بچوں کے حمل میں 32 ویں ہفتے کے بعد سفر کی اجازت نہیں ہوتی تاکہ دوران پرواز زچگی کے امکانات کو کم کیا جا سکے۔

سکیورٹی چیکنگ کے آلات

حاملہ خواتین کے ذہن میں اکثر یہ سوال آتا ہے کہ کیا ایئرپورٹ کے سکیورٹی اسکینرز محفوظ ہیں؟

یورپی یونین کے اصولوں کے مطابق حاملہ مسافر کو اسکیننگ ڈیوائس سے گذرنے سے انکار کرنے اور اس کے بجائے دستی تلاشی مانگنے کا حق حاصل ہے، اگرچہ متعلقہ حکام کا دعویٰ ہے کہ موجودہ سکیورٹی آلات ماں اور بچے کے لیے محفوظ ہیں۔ کچھ ایئرپورٹس رازداری کے تحفظ کے لیے الگ جگہ پر تلاشی کی سہولت بھی فراہم کرتے ہیں۔

محفوظ سفر

امریکن کالج آف آبسٹیٹریشینز اینڈ گائناکالوجسٹ (ACOG) کے مطابق پیچیدگیوں سے پاک حمل کے زیادہ تر کیسز میں فضائی سفر محفوظ ہے۔ سفر کے دوران سیٹ بیلٹ کو پیٹ کے نچلے حصے پر باندھنا، کافی مقدار میں پانی پینا اور خاص طور پر طویل پروازوں میں خون کے لوتھڑے بننے کے خطرے کو کم کرنے کے لیے اپنے پیروں اور ٹانگوں کو باقاعدگی سے حرکت دینا ضروری ہے۔ نیز، چلنے پھرنے اور ضرورت پڑنے پر واش روم جانے میں آسانی کے لیے راہداری کے قریب سیٹ منتخب کرنے کا مشورہ دیا جاتا ہے۔

بکنگ سے پہلے

ماہرین کا مشورہ ہے کہ صرف ٹکٹ بک کروانے پر اکتفا نہ کریں بلکہ ایئر لائن کی حاملہ خواتین کے لیے مخصوص پالیسی کو ضرور پڑھیں۔ یہ شرائط طبی رپورٹس، سفر کی اجازت کے اوقات یا ایئرپورٹ اور طیارے کے اندر دی جانے والی خدمات کے حوالے سے مختلف ہو سکتی ہیں۔

آخر میں ایئر لائن کے ملازم سے ایک سوال پوچھنا یا سفر سے پہلے ان کی ویب سائٹ دیکھنا، آپ کے سفر کو زیادہ آرام دہ اور کم تھکا دینے والا بنانے کے لیے کافی ہو سکتا ہے۔