امریکا کا داعش کے جوابی حملوں پر انتباہ

امریکا نے خبردار کیا ہے کہ اس کے عراق اور شام میں دولت اسلامی (داعش) پر فضائی حملوں کے ردعمل میں دنیا بھر میں جنگجو گروپوں کی جانب سے جوابی حملے ہوسکتے ہیں۔

امریکا کے محکمہ خارجہ نے دنیا بھر کے لیے جمعہ کو ایک نیا انتباہ جاری کیا ہے اور کہا ہے کہ''22 ستمبر کو عراق اور شام میں دولت اسلامی کے جنگجوؤں کے خلاف امریکا اور اس کے علاقائی اتحادیوں نے فوجی مہم کا آغاز کیا تھا۔اس کے ردعمل میں داعش نے دنیا بھر میں موجود اپنے حامیوں سے کہا ہے کہ وہ جہاں کہیں بھی موجود ہیں،وہ غیرملکیوں کو اپنے حملوں میں نشانہ بنائیں''۔

محکمہ خارجہ کے اس انتباہ کے مطابق ''امریکی حکام کو یقین ہے کہ اب داعش کی جانب سے امریکا ،مغرب اور ان کے اتحادیوں کے مفادات پر دنیا بھر میں حملے ہوسکتے ہیں۔خاص طور پر مشرق وسطیٰ ،شمالی افریقہ ،یورپ اور ایشیا میں ان کے مفادات کو نشانہ بنایا جاسکتا ہے''۔