حوثیوں پر بمباری کے بعد صنعا دھماکوں سے لرز اٹھا

سعودی عرب کی قیادت میں اتحادی ممالک کے لڑاکا طیاروں نے یمن کے دارالحکومت صنعا میں ایک فوجی کیمپ اور کمپاؤنڈ پر بمباری کی ہے جس کے بعد پورا علاقہ دھماکوں سے لرز اٹھا ہے۔

اتحادی طیاروں نے صنعا کے شمالی علاقے میں بدھ کی صبح حوثی ملیشیا کے زیر قبضہ فرسٹ آرمرڈ بریگیڈ کے کیمپ اور اس کے نزدیک واقع ایک کمپاؤنڈ پر حملے کیے ہیں جس کے بعد علاقے سے دھویں کے بادل اٹھنا شروع ہوگئے۔

عینی شاہدین کے مطابق ان دونوں جگہوں کو حوثی باغی گذشتہ سال ستمبر میں صنعا پر قبضے کے بعد سے اسلحہ ڈپوؤں کے طور پر استعمال کررہے ہیں۔طبی ذرائع نے فرانسیسی خبررساں ادارے اے ایف پی کو بتایا ہے کہ ان حملوں اور ان کے بعد بم دھماکوں میں تین افراد ہلاک اور گیارہ زخمی ہوگئے ہیں۔

اتحادی طیاروں نے صنعا کے شمال میں واقع حمدان میں بھی ایران کے حمایت یافتہ حوثی باغیوں اور ان کے اسلحہ ڈپوؤں پر بمباری کی ہے۔اس کے علاوہ شہر کے وسط میں واقع حوثی ملیشیا کی ملٹری پولیس کے کیمپ اور ایک اور فوجی مرکز کو بھی فضائی حملوں میں نشانہ بنایا گیا ہے۔

سعودی عرب کی قیادت میں اتحاد کے لڑاکا طیاروں نے شمالی صوبوں الجوف ،صعدہ اور حجہ میں حوثی باغیوں کے ٹھکانوں پر بمباری کی ہے۔یہ تمام علاقے سعودی عرب کی سرحد کے ساتھ واقع ہیں۔یمن کے تیسرے بڑے شہر تعز اور جنوبی صوبے الضالع میں بھی حوثی باغیوں اور ان کے اتحادی سابق صدر علی عبداللہ صالح کی وفادار فورسز کے ٹھکانوں پر نئے حملے کیے گئے ہیں۔