ٹریول ایجنسیوں کو سعودی عرب کے سیاحتی ویزے جاری کرنے کا اختیار مل گیا

سعودی حکومت نے ڈی کیٹیگری کی ٹریول ایجنسیوں کو سعودی عرب کے اندر اور بیرون ملک سے سیاحتی، تعلیمی اور طبی بنیادوں پر ویزے جاری کرنے کا اختیار دے دیا ہے۔

العربیہ ڈاٹ نیٹ نے سعودی آن لائن نیوز پورٹل 'سبق' کے حوالے سے اپنی رپورٹ میں بتایا ہے کہ سعودی کمیشن برائے سیاحت وقومی ورثہ نے پہلی ٹریول ایجنسی کو ویزا جاری کرنے کا لائسنس دے دیا ہے۔

سیاحت کمیشن کے مکہ میں ڈائریکٹر محمد عبداللہ الامری کا کہنا ہے کہ ان کے ادارے کے قیام سے قبل سیاحت اور سفر کے شعبوں کو شدید مشکلات در پیش تھیں۔ اس کے بعد شہزادہ سلطان بن سلمان کے خصوصی احکامات کی روشنی میں سیاحتی شعبے کے فروغ کے لئے جدید ترین ٹکنالوجی کا استعمال کیا گیا ہے۔