شواہد کی کمی، وائٹ ہائوس میں کوکین کی موجودگی کی تحقیقات ختم

امریکی صدارتی محل وائٹ ہاؤس سے کوکین ملنے کی تحقیقات شواہد کی کمیابی کے سبب ختم کر دی گئی۔

امریکی خفیہ ادارے سیکرٹ سروس کا کہنا ہے کہ فنگر پرنٹ، ڈی این اے اور ویڈیو فوٹیج کے جائزوں کے باوجود وائٹ ہاؤس میں کوکین چھوڑنے والے شخص کی نشاندہی نہیں ہوسکی ہے۔

اس سے قبل رواں ماہ وائٹ ہاؤس کی ترجمان کیرین جین پیئر نے میڈیا سے گفتگو کرتے ہوئے کہا تھا کہ ہم ہر ایکشن لیں گے جو کہ مناسب اور قابل ضمانت ہو، سیکرٹ سروس اس معاملے کی تحقیقات کر رہی ہے۔

واضح رہے کہ رواں ماہ کے آغاز میں وائٹ ہاؤس کے ایگزیکٹو ایونیو کے داخلی ہال سے کوکین برآمد کی گئی تھی۔ اس ہال سے ایک چھوٹا پلاسٹک بیگ برآمد کیا گیا۔

وائٹ ہاؤس کے اندر جانے سے پہلے یہاں موبائل فونز اور دیگر ذاتی ڈیوائسز رکھوائی جاتی ہیں۔