برطانیہ کی شہزادی این معمولی زخمی، ہسپتال منتقل

بکنگھم پیلس نے بتایا کہ شاہ چارلس سوئم کی بہن شہزادی این کو ان کے آبائی دیہی گھر گیٹ کومب پارک میں ایک حادثہ پیش آیا جس کے نتیجے میں "معمولی زخموں اور دماغی جھٹکا لگنے" کے بعد وہ پیر کو ہسپتال میں داخل ہوئیں۔

بیان میں کہا گیا ہے کہ "عزت مآب شہزادی احتیاطی اقدام کے طور پر برسٹل کے ساؤتھ میڈ ہسپتال میں زیرِ مشاہدہ ہیں اور توقع ہے کہ وہ مکمل اور تیزی سے صحت یاب ہو جائیں گی۔" بیان میں مزید کہا گیا کہ یہ واقعہ اتوار کو پیش آیا۔

نیز کہا گیا، "بادشاہ کو پوری طرح باخبر رکھا گیا ہے اور انہوں نے شاہی خاندان کے ساتھ مل کر شہزادی کی جلد صحت یابی کے لیے اپنی محبت بھری اور نیک خواہشات بھیجیں۔"

73 سالہ شہزادی جنوب مغربی انگلینڈ کے ہسپتال میں ہی رہیں گی "جب تک ان کی طبی ٹیم کوئی اور مشورہ نہ دے"۔

گھڑسواری کی نہایت شوقین اور 1976 کے مونٹریال اولمپکس میں حصہ لینے والی شہزادی ضروری اضافی مصروفیات کی ذمہ داری لیے ہوئے ہیں کیونکہ بادشاہ اور ان کی بہو ویلز کی شہزادی کیتھرین دونوں کینسر سے صحت یاب ہو رہے ہیں۔

لیکن بکنگھم پیلس نے کہا کہ اگلے ہفتے کے لیے ان کی مصروفیات ملتوی کر دی جائیں گی جس میں جاپان کے شہنشاہ اور ملکہ کے لیے منگل کی سرکاری ضیافت بھی شامل ہے۔ اس ضیافت میں ان کی موجودگی طے شدہ تھی۔

گیٹ کومب پارک کا میدان ہر سال برٹش ایونٹنگ فیسٹیول کی میزبانی کے لیے مشہور ہیں جو دنیا کے بہترین گھڑ سوار ستاروں کو اپنی طرف متوجہ کرتا ہے۔