جنوبی افریقہ میں سکول منی بس حادثے کا شکار، بارہ بچے ہلاک

حکومت نے بتایا کہ بدھ کی صبح جنوبی افریقہ میں بارہ بچے اس وقت ہلاک ہو گئے جب جوہانسبرگ کے قریب سکول کی ایک منی بس دوسری گاڑی کی ٹکر لگنے کے بعد الٹ گئی اور اسے آگ لگ گئی۔

خوتینگ کی صوبائی حکومت نے ایک بیان میں کہا کہ منی بس کا ڈرائیور بھی ہلاک ہو گیا اور سات دیگر بچوں کو ہسپتال لے جایا گیا۔

حکومت فوری طور پر بچوں کی عمریں نہیں بتا سکی۔

ٹیلی ویژن کی تصاویر میں دکھایا گیا ہے کہ شہر کے مغرب میں 70 کلومیٹر سے زیادہ فاصلے پر میرافونگ میں صبح سویرے حادثے میں منی بس کو آگ لگ گئی جس سے وہ مکمل طور پر تباہ ہو گئی تھی۔

بیان میں کہا گیا، "ایک نجی سکالر ٹرانسپورٹ منی بس میرافونگ کے کوکوسی-ویڈیلا علاقے میں ایک المناک حادثے کا شکار ہو گئی جس میں 12 طلباء اور ان کے ڈرائیور کی جانیں گئیں۔"

بیان میں مزید کہا گیا، "اس کے علاوہ سات دیگر طلباء کو فوری طبی امداد کے لیے ہسپتال منتقل کر دیا گیا ہے۔"

خوتینگ کے وزیرِ تعلیم ماتومے شیلونے نے بیان میں کہا، "میں اس المناک واقعے پر بہت غمزدہ ہوں۔ بچوں کی جانوں کا ضیاع ہماری کمیونٹی کے لیے ایک تباہ کن دھچکا ہے اور ہمارے خیالات اور دعائیں جاں بحق اور زخمی ہونے والے طلباء کے اہلِ خانہ کے ساتھ ہیں۔"

جنوبی افریقہ کے پاس اس برِاعظم کا ایک ترقی یافتہ ترین روڈ نیٹ ورک ہے لیکن سڑک پر حفاظت کے حوالے سے اس کا بدترین ریکارڈ بھی ہے۔