سیلابی تباہ کاری : وزیراعظم پاکستان کا ملائیشین ہم منصب کے لیے فون پر اظہار ہمدردی

پاکستان کے وزیراعظم میاں محمد شہباز شریف نے ملائیشیا میں سیلاب کی زد میں 4 افراد کے ہلاک اور ایک لاکھ سے زائد کے بےگھر ہونے پر ملائیشین ہم منصب انور ابراہیم سے فون پر اظہار ہمدردی کیا ہے۔

حالیہ دنوں میں ملائیشیا کی مختلف ریاستوں میں سیلاب کی وجہ سے انسانی جانیں اور املاک خطرے سے دوچار ہوئی تھیں۔ جس سے کم از کم ایک لاکھ بائیس ہزار شہری بےگھر ہوئے ہیں اور انہیں نقل مکانی کرنا پڑی ہے۔ ملائیشیا کے ڈیزاسٹر مینیجمنٹ کے حکام نے ہفتہ کے روز بتایا ہے کہ شمالی ریاستوں میں سیلاب کی وجہ بے پناہ بارشوں کا مسلسل ہونا بنا۔

2014 میں آنے والے سیلاب میں 118000 شہریوں کو سیلاب کی تباہ کاریوں سے محفوظ مقام پر منتقل کیا گیا تھا۔

وزیر اعظم شہباز شریف نے ملائیشیا کے زیر اعظم انور ابراہیم سے ٹیلیفون پر بات کرتے ہوئے کہا 'اس پریشانی کی گھڑی میں پاکستانی عوام ملیشیا کے بھائیوں کے ساتھ ہے۔' شہباز شریف نے کہا مشکل کی اس گھڑی میں ہر ممکن مدد و تعاون کیا جائے گا۔

وزیراعظم کے دفتر کی طرف سے جاری کردہ بیان میں کہا گیا ہے کہ پاکستان ملائیشیا کے لیے فوری طور پر امداد روانہ کر رہا ہے۔ خیال رہے پاکستان اور ملائیشیا کے درمیان 1957 سے تعلقات ہیں۔ دونوں ممالک معاشی، ثقافتی اور دفاعی حوالوں سے دوستانہ تعلقات رکھتے ہیں۔