امیر قطر روس کے سرکاری دورے پر ماسکو پہنچ گئے

امیرقطر کے الشیخ تمیم بن حمد آل ثانی روس کے سرکاری دورے پر ماسکو پہنچ گئے۔ کریملن نے اپنی سرکاری ویب سائٹ پر ایک بیان شائع کیا جس میں کہا گیا ہے کہ روسی صدر ولادیمیر پوتین الشیخ تمیم سے بات چیت کریں گے جس میں دونوں ملکوں کے درمیان تعلقات اور باہمی دلچسپی کے امور کا جائزہ لیا جائے گا۔

بیان میں وضاحت کی گئی ہے کہ ماسکو میں ہونے والی بات چیت میں باہمی دلچسپی کے متعدد مسائل پر توجہ دی جائے گی، جس میں تجارتی، اقتصادی اور انسانی شعبوں میں دوطرفہ تعاون کے علاوہ ایجنڈے میں متعدد بین الاقوامی موضوعات پر بات چیت ہوگی۔

من 2

• 
• 

(2 تصاویر)

روسی خبر رساں ایجنسی نے رپورٹ کیا کہ صدر پوتین اور امیر قطر کے درمیان ہونے والی ملاقات میں علاقائی مسائل، خاص طور پر یوکرینی بحران پر تبادلہ خیال شامل ہے۔ اس حوالےسے قطر متعدد بحرانوں کو حل کرنے کی کوششوں میں نمایاں کردار ادا کرتا ہے۔

قطری اخبارات نے اس دورے کو "دوطرفہ تعلقات کے فریم ورک ، بحرانوں کو حل کرنے اور بین الاقوامی سلامتی اور استحکام کو بڑھانے کے لیے قطر کی ثالثی کی کوششوں کے ضمن میں اسٹریٹجک جہتوں کا حامل قرار دیا ہے"۔