برطانیہ کے وزیر خارجہ ڈیوڈ لیمی نے کہا ہے کہ برطانوی شہریوں کے لیے تل ابیب سے چارٹر پروازوں کے لیے اسرائیلی حکام کے ساتھ کام کر رہے ہیں۔
ڈیوڈ لیمی کے جمعہ کے روز جاری کردہ بیان میں کہا گیا ہے کہ برطانوی شہریوں کی اسرائیل سے بحفاظت واپسی کے لیے کام کا آغاز کر دیا گیا ہے۔ شہریوں کی برطانیہ واپسی کے لیے چارٹرڈ پروازوں کا اہتمام کیا جائے گا۔ تاہم ان پروازوں کا آغاز اس وقت ہوگا جب اسرائیلی فضائی حدود دوبارہ کھلے گی۔
خیال رہے جمعہ کے روز سے جاری ایران اسرائیل جنگ کی وجہ سے اسرائیل کا بین گورین ایئرپورٹ پروازوں کے لیے بند کر دیا گیا ہے۔
وزیر خارجہ ڈیوڈ لیمی نے اسرائیل میں موجود برطانوی شہریوں کو اپنے اندراج کے لیے کہا ہے۔ نیز کہا ہے کہ برطانیہ جاری جنگی صورتحال پر نظر رکھے ہوئے ہے اور شہریوں کی بحفاظت برطانیہ واپسی کے لیے مختلف آپشنز پر غور کر رہے ہیں۔
