برطانیہ نے جاسوسوں کی بھرتی کے لیے ڈارک ویب پر نیا پلیٹ فارم متعارف کرا دیا!

برطانوی خفیہ ایجنسی MI6 (ایم آئی 6) نے انٹرنیٹ کے "ڈارک ویب" پر ایک ویب سائٹ جاری کی ہے۔ اس ویب سائٹ کا مقصد روس اور دنیا بھر میں خفیہ ایجنٹوں کی بھرتی کے لیے انھیں رابطے کا ایک محفوظ راستہ فراہم کرنا ہے۔

ادارے نے اعلان کیا کہ "Silent Courier" نامی سائٹ ایسے کسی بھی شخص کے لیے موقع فراہم کرتی ہے جو دہشت گردی یا دشمنانہ جاسوسی سرگرمیوں سے متعلق حساس معلومات تک رسائی رکھتا ہو، تاکہ وہ برطانوی حکام سے محفوظ طریقے سے رابطہ کر سکے۔

نئے گیٹ وے تک رسائی کے طریقہ کار کی ہدایات خفیہ ایجنسی نے کے یوٹیوب چینل پر دستیاب ہیں۔

اپنے عہدے سے سبکدوش ہونے والے 'ایم آئی 6' کے سربراہ رچرڈ مور نے سائٹ کے اجراء کے موقع پر ممکنہ جاسوسوں سے کہا کہ "ہمارا ورچوئل دروازہ آپ کے لیے کھلا ہے"۔

ایجنسی کا کہنا ہے کہ وہ افراد جو "ٹور" براؤزر کے ذریعے ڈارک ویب تک پہنچنا چاہتے ہیں تو اسے استعمال کریں اور اپنے ذاتی آلات اور ای میل اکاؤنٹ کی بجائے ایسے آلات اور ای میل اکاؤنٹ استعمال کریں جو ان سے منسلک نہ ہوں، تاکہ شبہات پیدا نہ ہوں۔

متعدد زبانوں میں شائع کی گئی ہدایت میں مزید کہا گیا کہ اگر "ٹور" پر بندش ہو تو متبادل کے طور پر VPN نیٹ ورک استعمال کیے جا سکتے ہیں۔

برطانوی وزیرِ خارجہ ایویٹ کوپر نے کہا ہے کہ "جہاں دنیا بدل رہی ہے اور ہمیں بڑھتے ہوئے خطرات کا سامنا ہے، ہمیں یقینی بنانا چاہیے کہ برطانیہ ہمیشہ اپنے حریفوں سے ایک قدم آگے رہے۔"

انھوں نے مزید کہا "ہم نے جدید ترین ٹیکنالوجی کے ذریعے ان کے اقدامات کو تقویت دی ہے تاکہ خارجہ خفیہ ایجنسی نئے جاسوس بھرتی کر سکے ... روس اور دنیا بھر میں۔"