اوباما کی "ہاتھ پکڑنے" کی ویڈیو پر بائیڈن خاندان اوباما سے ناراض: کتاب میں انکشاف
ہنٹر بائیڈن کا کہنا ہے "میں تقریباً اسٹیج پر چڑھ گیا تھا کہ کہوں، ایسا مت کرو!"
امریکہ کے سابق صدر جو بائیڈن کے خاندان کے اندرونی جذبات پر مبنی ایک نیا انکشاف سامنے آیا ہے۔ اگلے ہفتے شائع ہونے والی ایک نئی کتاب کے مطابق بائیڈن خاندان سابق صدر باراک اوباما سے اس وقت سخت ناراض ہوا جب گذشتہ سال ہالی وُڈ میں ایک فنڈ ریزنگ تقریب کے دوران اوباما نے بائیڈن کا ہاتھ پکڑ کر انہیں اسٹیج سے نیچے اُتارا تھا۔
یہ کتاب"انتقام: ڈونلڈ ٹرمپ اور وہ مہم جس نے امریکہ کو بدل دیا" کے عنوان سے لکھی گئی ہے۔ یہ اے بی سی نیوز کے نامہ نگار جوناتھن کارل نے تحریر کی ہے۔ مصنف کے مطابق اس واقعے کی ویڈیو سوشل میڈیا پر تیزی سے وائرل ہوئی ، جس پر طنزیہ تبصرے کیے گئے اور اس پر بائیڈن کے صاحبزادے ہنٹر بائیڈن خاصے برہم ہوئے۔
ہنٹر بائیڈن کے بہ قول "میں تقریباً اسٹیج پر چڑھ کر اوباما سے کہہ دیتا، براہِ کرم ایسا کبھی مت کریں۔ صدرِ امریکہ کو کسی کے سہارے کی ضرورت نہیں"۔ انہوں نے مزید کہا کہ "میرے والد صرف سامعین سے مصافحہ کر رہے تھے، لیکن اوباما نے انہیں جیسے ہاتھ سے پکڑ کر نیچے اتارا، وہ منظر مزاح کا موضوع بن گیا اور مجھے یہ بات بہت ناگوار گزری"
یہ ویڈیو اُس فنڈ ریزنگ تقریب کے دوران لی گئی تھی جو بائیڈن کی انتخابی مہم کے لیے منعقد کی گئی۔ اُس وقت ناقدین نے اس منظر کو بائیڈن کی عمر اور کمزوری کی علامت کے طور پر پیش کیا، جب کہ دیگر لوگوں نے اسے دو پرانے دوستوں کے درمیان ایک دوستانہ بے تکلفی قرار دیا۔
کتاب میں مصنف نے صدر ڈونلڈ ٹرمپ کی دوسری مدتِ صدارت کی پالیسیوں پر بھی روشنی ڈالی ہے۔ ان کے مطابق ٹرمپ کا دوسرا دور پہلا دور ختم کرنے کے بعد "زیادہ مؤثر اور دیرپا اثرات" کا حامل ثابت ہوا، جو امریکہ کی سیاست پر طویل عرصے تک اثرانداز رہے گا۔
جوناتھن کارل نے بتایا کہ "انتقام" کا عنوان ان کے ذہن میں اُس دن آیا جب ٹرمپ دوبارہ منتخب ہوئے۔ ان کے مطابق "یہ لفظ اب ٹرمپ کے سیاسی رویّے اور حکمتِ عملی کی درست ترین ترجمانی کرتا ہے"۔
