انٹر میلان کے گول کیپر جوزیپ مارٹینیز کی گاڑی سے معمر شخص ہلاک

اطالوی میڈیا کے مطابق انٹر میلان کے متبادل گول کیپر جوزیپ مارٹینیز کی گاڑی سے ٹکر لگنے کے باعث 81 سالہ معمر شخص ہلاک ہو گیا۔ یہ افسوسناک واقعہ منگل کی صبح ساڑھے نو بجے انٹر میلان کے تربیتی مرکز کے قریب پیش آیا۔

حادثے کے فوراً بعد امدادی کارروائیاں شروع کی گئیں، تاہم بزرگ شخص موقع پر ہی دم توڑ گیا، جبکہ “لا گازیتا دیللو سپورٹ” کے مطابق گول کیپر مارٹینیز محفوظ رہا۔

ابتدائی تحقیقات کے مطابق ہلاک ہونے والا شخص کچھ بے چینی محسوس کر رہا تھا اور اچانک اپنی وہیل چیئر کا رخ مخالف سمت میں موڑ دیا، جس سے مارٹینیز کی گاڑی کے سامنے آ گیا اور حادثہ پیش آ گیا۔

رپورٹ کے مطابق ٹکر نہایت شدید تھی۔ موقع پر ایمبولینس، پولیس اور ہیلی کاپٹر پہنچ گئے۔

اطالوی ذرائع ابلاغ نے بتایا کہ انٹر میلان کے گول کیپر نے فوراً امداد فراہم کرنے کی کوشش کی اور وہ واقعے سے واضح طور پر متاثر دکھائی دیا۔ اس نے حکام سے مکمل تعاون کیا۔

یہ بھی بتایا گیا ہے کہ ہسپانوی کھلاڑی جوزیپ مارٹینیز انٹر کے مرکزی گول کیپر سومر کا متبادل ہے اور اس سیزن میں دو میچ کھیل چکا ہے۔

حادثے کے بعد انٹر میلان کلب نے ٹیم کے فیورینٹینا کے خلاف میچ سے قبل ہونے والی پریس کانفرنس منسوخ کر دی اور بزرگ شخص کے احترام میں سوگ کا اعلان کیا۔