امریکی ایلچی وٹکوف غزہ کے معاملے پر ثالثوں سے ملاقات کریں گے

وائٹ ہاؤس کے ایک عہدیدار نے انکشاف کیا ہے کہ امریکی صدر کے ایلچی سٹیو وٹکوف جمعہ کو فلوریڈا کے شہر میامی میں ثالثوں قطر، مصر اور ترکیہ کے اعلیٰ حکام کے ساتھ ایک اہم ملاقات کریں گے۔ اکسیوس کے مطابق اس ملاقات کا مقصد غزہ کی پٹی میں جنگ بندی کے معاہدے کے اگلے مرحلے پر بحث کرنا ہے۔ اجلاس میں قطر کے وزیر اعظم اور وزیر خارجہ محمد بن عبدالرحمن آل ثانی، ترکیہ کے وزیر خارجہ ہاکان فیدان اور مصر کے وزیر خارجہ بدر عبدالعاطی شرکت کریں گے۔ ملاقات کا مقصد اسرائیل اور حماس پر معاہدے کی ذمہ داریاں پوری کرنے کے لیے دباؤ ڈالنے کے عملی اقدامات پر اتفاق کرنا ہے۔ یہ ملاقات ایک ایسے وقت میں ہو رہی ہے جب واشنگٹن کو معاہدے کے دوسرے مرحلے پر عمل درآمد میں سستی پر تشویش ہے۔

سخت پیغام

ذرائع کے مطابق وائٹ ہاؤس نے گزشتہ ویک اینڈ پر اسرائیلی وزیر اعظم نیتن یاہو کو ایک انتہائی سخت نجی پیغام بھیجا ہے جس میں کہا گیا ہے کہ حماس کے سینئر فوجی کمانڈر رائد سعد کی ہلاکت جنگ بندی کی خلاف ورزی ہے۔ ٹرمپ نے نیتن یاہو سے حالیہ فون کال میں کہا ہے کہ وہ غزہ کے معاملے میں بہتر شراکت دار بنیں۔ دونوں رہنماؤں کی ملاقات 29 دسمبر کو مارالاگو ریزورٹ میں متوقع ہے۔

حماس نے اسرائیلی حملے کو جنگ بندی اور صدر ٹرمپ کے منصوبے کی خلاف ورزی قرار دیتے ہوئے الزام لگایا ہے کہ اسرائیل جان بوجھ کر امن کی کوششوں کو سبوتاژ کر رہا ہے۔ دوسری طرف اسرائیل مطالبہ کر رہا ہے کہ حماس غیر مسلح ہو جائے۔ ادھر حماس کا کہنا ہے کہ وہ ہتھیار نہیں ڈالے گی اور وہ اسرائیلی افواج کے مکمل انخلاء کا مطالبہ کر رہی ہے۔