دماغی کمزوری کی ابتدائی علامات کے چھ اشارے۔

ایک نئی تحقیق میں ظاہر ہوا ہے کہ درمیانی عمر میں ڈپریشن کی علامات بعد میں ڈیمینشیا کے خطرے کی نشاندہی کر سکتی ہیں، جس سے ڈاکٹرز اور مریض ابتدائی طور پر احتیاطی اقدامات کر سکتے ہیں۔ ''سائنس الرٹ '' کے مطابق یونیورسٹی کالج لندن کی قیادت میں کی گئی، اس تحقیق میں محققین نے چھ مخصوص علامات کی نشاندہی کی جو بعد میں ڈیمینشیا کی وارننگ کا کام دے سکتی ہیں۔

ماہرِ نفسیات و ماہر وبائیات فلِپ فرانک کے مطابق: نتائج سے ظاہر ہوتا ہے کہ ڈیمینشیا کا خطرہ صرف ڈپریشن کے مجموعی اثر سے نہیں بلکہ مخصوص علامات کے مجموعے سے جڑا ہوا ہے۔

تحقیق میں1185افراد کا ڈیٹا تجزیہ کیا گیا، جن کی عمر 1997سے1999کے درمیان45 سے69 سال تھی اور وہ سب خرف سے پاک تھے۔ پھر ان رضاکاروں کی صحت تقریباً دو دہائیوں تک ٹریک کی گئی اور برطانیہ کے صحت کے ریکارڈز استعمال کر کے 2023تک ڈیمینشیا کی تشخیص کی گئی۔اس دوران101فیصد شرکاء کو ڈیمینشیا لاحق ہوا اور وہ افراد جنہوں نے درمیانے عمر میں پانچ یا زیادہ ڈپریشن کی علامات ظاہر کیں، ان میں خرف کا خطرہ 27زیادہ پایا گیا۔

تاہم اس خطرے میں اضافہ چھ مخصوص ڈپریشن کی علامات کی وجہ سے تھا، جو مجموعی طور پر30علامات میں سے منتخب کی گئی تھیں۔

یہ چھ علامات درج ذیل ہیں:

خود اعتمادی کا فقدان، مسائل سے نمٹنے میں دشواری، دوسروں کے لیے محبت یا لگاؤ محسوس نہ کرنا، مستقل دباؤ یا تناؤ کا احساس، توجہ مرکوز کرنے میں دشواری اور کاموں کی کارکردگی پر عدم اطمینان۔

خود اعتمادی کا فقدان اور مسائل سے نمٹنے میں ناکامی خاص طور پر اہم سمجھی گئیں، کیونکہ ہر ایک نے خرف کے خطرے کو تقریباً 50فیصد تک بڑھا دیا۔

دوسری طرف کچھ علامات جیسے نیند کی خرابی اور خودکشی کے خیالات کا خرف کے طویل مدتی تشخیص سے کوئی تعلق نہیں دکھایا گیا۔اگرچہ اس تحقیق کا ڈیزائن براہِ راست سبب و مسبب کا تعین نہیں کرتا، لیکن یہ ظاہر کرتا ہے کہ ڈپریشن کے کچھ عناصر خرف کے امکانات میں اضافہ سے جڑے ہو سکتے ہیں اور یہ سمجھنے میں مدد دے سکتا ہے کہ کچھ افراد کو خرف کیوں لاحق ہوتا ہے اور دوسروں کو نہیں۔

فلِپ فرانک کے مطابق: درمیانے عمر میں روزمرہ کی علامات میں بہت اہم معلومات چھپی ہوتی ہیں جو طویل مدت میں دماغ کی صحت کی نشاندہی کرتی ہیں۔ ان نمونوں پر توجہ دینے سے ابتدائی احتیاطی اقدامات کے نئے راستے کھل سکتے ہیں۔
یہ بات بھی واضح ہے کہ ڈپریشن اور خرف دونوں پیچیدہ اور کثیر الجہتی ہیں اور افراد کے لحاظ سے مختلف ہوتے ہیں، جس سے ان کے درمیان تعلق تلاش کرنا مشکل مگر ناممکن نہیں ہے، جیسا کہ اس تحقیق سے ظاہر ہوتا ہے۔تاہم، اس نتیجے کو ہر فرد پر لاگو کرنا ممکن نہیں، کیونکہ یہ تحقیق صرف برطانیہ میں صحت مند سرکاری ملازمین پر کی گئی۔

تحقیق میں یہ بھی دیکھا گیا کہ اس طویل المدتی مطالعے میں خرف کی شرح عام برطانوی آبادی کے مقابلے میں کم تھی۔

محققین کا کہنا ہے کہ زیادہ متنوع آبادی پر مزید تحقیقات کی ضرورت ہے، خاص طور پر جب دنیا کی آبادی کے بڑھاپے کی طرف جانے کے ساتھ خرف کے کیسز میں اضافہ متوقع ہے۔ لیکن یہ تحقیقات سائنسدانوں کو ابتدائی اقدامات کے لیے کم از کم نقطہ آغاز فراہم کر سکتی ہیں اور اگر کچھ کیسز کی روک تھام ممکن ہو جائے تو فرق بہت بڑا ہو سکتا ہے۔

ماہر وبائیات میکا کیویمکی کے مطابق: ڈپریشن ایک جیسا ظاہر نہیں ہوتا، علامات میں کافی فرق ہوتا ہے اور اکثر یہ اضطراب کی علامات کے ساتھ بھی جڑی ہوتی ہیں۔ ہم نے دیکھا کہ یہ باریک اور مخصوص نمونے ان افراد کی شناخت کر سکتے ہیں جو اعصابی امراض کے زیادہ شکار ہیں.