خاتون اینکر پر برہم ٹرمپ، مسکراہٹ پر ذاتی تبصرہ

جیفری ایپسٹین کی نئی فائلوں کے اجرا سے پیدا ہونے والی ہلچل کے دوران امریکی صدر ڈونلڈ ٹرمپ نے کہا ہے کہ اب امریکی عوام کو دیگر اہم مسائل پر توجہ دینی چاہیے۔

منگل کی شام وائٹ ہاؤس میں پریس کانفرنس کے دوران ٹرمپ کا کہنا تھا کہ ان فائلوں میں ان کے خلاف کچھ بھی سامنے نہیں آیا اور اب وقت آ گیا ہے کہ ملک ایسے معاملات پر غور کرے جو عوام کے لیے واقعی اہم ہیں۔

اسی موقع پر سی این این کی نامہ نگار کائٹلان کولنز نے صدر سے متاثرین اور ان کے حقوق سے متعلق سوال کیا اور پوچھا کہ ان لوگوں کے لیے آپ کیا کہیں گے جو سمجھتے ہیں کہ انہیں انصاف نہیں ملا؟

اس سوال پر ٹرمپ برہم ہو گئے اور سخت لہجے میں جواب دیا:''تم بدترین صحافی ہو… مجھے نہیں لگتا میں نے تمہیں کبھی مسکراتے دیکھا ہو ''۔

کولنز نے جواب میں کہا: میں متاثرین کے بارے میں سوال کر رہی ہوں۔جس پر ٹرمپ نے مزید ناراضی کا اظہار کرتے ہوئے کہا:کیا تم جانتی ہو کہ تم مسکراتی کیوں نہیں؟ کیونکہ تم سچ نہیں بولتیں… تم ایک شرمندگی ہو… تمہارے جھوٹے ادارے کو تم پر شرم آنی چاہیے۔

واضح رہے کہ جیفری ایپسٹین گزشتہ برسوں میں امریکا میں شدید بحث کا موضوع رہا، کیونکہ اس امیر کاروباری شخصیت پر کم عمر لڑکیوں کے جنسی استحصال اور انسانی اسمگلنگ جیسے سنگین الزامات عائد تھے۔

ایپسٹین پر 2008 میں مقدمہ چلا، تاہم اس وقت ایک متنازع عدالتی معاہدے کے تحت معاملہ ختم ہو گیا۔ بعد ازاں 2019 میں نیویارک میں اسے دوبارہ وفاقی الزامات کے تحت گرفتار کیا گیا۔اگست 2019 میں ایپسٹین نیویارک کی جیل میں مردہ پایا گیا اور حکام نے اس کی موت کو خودکشی قرار دیا، تاہم اس واقعے نے مزید تنازع اور سازشی نظریات کو جنم دیا، خصوصاً اس کے تعلقات معروف شخصیات اور دونوں بڑی امریکی سیاسی جماعتوں کے رہنماؤں سے ہونے کے باعث۔