ایک عراقی اہلکار نے ہفتے کے روز اے ایف پی کو بتایا، عراق کو اب تک داعش گروپ کے 2,225 قیدی مل گئے ہیں جنہیں امریکی فوج نے گذشتہ ماہ شام سے منتقل کرنا شروع کیا تھا۔
یہ داعش کے ان 7000 قیدیوں میں شامل ہیں جن کی شام سے عراق منتقلی کا امریکی مرکزی کمان (سینٹ کام) نے گذشتہ ماہ اعلان کیا تھا۔ بتایا گیا تھا کہ اس اقدام کا مقصد "اس بات کو یقینی بنانا تھا کہ دہشت گرد محفوظ حراستی مراکز میں رہیں۔"
قبل ازیں انہیں شمال مشرقی شام میں کردوں کے زیرِ قیادت سیریئن ڈیموکریٹک فورسز (ایس ڈی ایف) کے زیرِ انتظام جیلوں اور کیمپوں میں رکھا گیا تھا۔
گذشتہ ماہ شام کے لیے امریکی ایلچی ٹام براک نے اعلان کیا تھا کہ داعش کا مقابلہ کرنے میں ایس ڈی ایف کا کردار ختم ہو گیا تھا جس کے بعد منتقلی کے منصوبے کا اعلان سامنے آیا۔
عراقی وزیرِ اعظم کے دفتر سے منسلک سکیورٹی انفارمیشن سیل کے سربراہ سعد مان نے ہفتے کے روز اے ایف پی کو بتایا، "عراق کو زمینی اور فضائی راستے سے بین الاقوامی اتحاد کے اشتراک سے شام سے 2,225 دہشت گرد ملے ہیں۔"
انہوں نے کہا، انہیں "سخت اور باقاعدہ حراستی مراکز" میں رکھا گیا ہے۔
ایک کرد فوجی ذریعے نے اے ایف پی کو "بین الاقوامی اتحاد کی حفاظت میں شام سے عراق میں داعش کے قیدیوں کی مسلسل منتقلی" کی تصدیق کی۔
ہفتے کے روز شمال مشرقی شام میں کرد اکثریتی شہر قمشلی کے قریب اے ایف پی کے ایک فوٹوگرافر نے امریکی فوجی قافلےاور رنگین کھڑکیوں والی 11 بسیں دیکھیں۔
عراق کا حوالگی کا مطالبہ
پیر کے روز عراقی عدلیہ نے اعلان کیا کہ اس نے امریکی فوجی کارروائی کے تحت موصول ہونے والے 1,387 قیدیوں سے تفتیشی طریقہ کار شروع کر دیا تھا۔
ہفتے کے روز عراقی خبر رساں ایجنسی کو ایک بیان میں سعد مان نے کہا، "بنیادی اصول یہ ہے کہ عراقیوں کے خلاف جرائم میں ملوث تمام افراد اور دہشت گرد داعش تنظیم سے تعلق رکھنے والوں کو مجاز عراقی عدالتوں کے سامنے پیش کیا جائے۔"
عراقی سکیورٹی ذرائع کے مطابق عراق منتقل ہونے والے قیدیوں میں شامی، عراقی، یورپی اور دیگر قومیتوں کے حامل افراد شامل ہیں۔
عراق متعلقہ ممالک سے مطالبہ کر رہا ہے کہ وہ اپنے شہریوں کو وطن واپس لے جائیں اور ان کے خلاف قانونی کارروائی کو یقینی بنائیں۔
مان نے مشاہدہ کیا کہ "قانونی تقاضے پورے ہو جائیں تو دہشت گردوں کی ان کے ممالک کو حوالگی کا عمل شروع ہو جائے گا۔"
