یوکرینی صدر کا سعودی عرب کا اچانک دورہ، محمد بن سلمان سے اہم ملاقات

سعودی عرب کے ولی عہد شہزادہ محمد بن سلمان اور یوکرین کے صدر ولادی میر زیلنسکی کے درمیان جمعرات کو جدہ میں اہم ملاقات ہوئی ہے۔

یوکرین کے صدر نے سعودی عرب کا اچانک دورہ ایک ایسے وقت میں کیا ہے جب مشرقِ وسطیٰ میں جاری جنگ کے باعث خلیجی ممالک یوکرین کی فضائی دفاعی ٹیکنالوجی میں دلچسپی لے رہے ہیں۔

سعودی پریس ایجنسی کے مطابق زیلنسکی نے جدہ میں سعودی ولی عہد محمد بن سلمان سے ملاقات کی، جس میں دونوں رہنماؤں نے خطے میں بڑھتی کشیدگی اور یوکرین بحران پر بات کی۔

ملاقات سے قبل زیلنسکی نے سوشل میڈیا پر بتایا تھا کہ ’سعودی عرب پہنچ گیا ہوں، اہم ملاقاتیں شیڈول ہیں۔ ہم حمایت کو سراہتے ہیں اور ان کے ساتھ کام کرنے کے لیے تیار ہیں جو سکیورٹی یقینی بنانے میں ہمارے ساتھ ہیں۔‘