ایران کے حوالے سے ہمارے پاس اچھی خبریں ہیں : ٹرمپ

امریکہ کے صدر ڈونلڈ ٹرمپ نے ایران کے ساتھ جاری جنگ کے خاتمے کے لیے ہونے والے امن مذاکرات کے حوالے سے مثبت اشارے دیتے ہوئے کہا ہے کہ ایران کے بارے میں کچھ بہت اچھی خبریں موجود ہیں۔ واشنگٹن واپسی کے دوران صحافیوں سے گفتگو کرتے ہوئے ڈونلڈ ٹرمپ نے توقع ظاہر کی کہ مشرق وسطیٰ میں معاملات بہتری کی طرف جا رہے ہیں اور ہفتے کے آغاز پر ہونے والے مذاکرات کامیاب رہیں گے۔

انہوں نے واضح کیا کہ سب سے اہم بات یہ ہے کہ ایران کو ایٹمی ہتھیار حاصل کرنے کی اجازت کسی صورت نہیں دی جائے گی۔تاہم ڈونلڈ ٹرمپ نے یہ انتباہ بھی کیا کہ اگر بدھ تک کوئی طویل مدتی معاہدہ طے نہ پایا تو جنگ بندی ختم کی جا سکتی ہے، جبکہ ایرانی بندرگاہوں کا امریکی محاصرہ بدستور جاری رہے گا۔ یاد رہے کہ 28 فروری کو امریکہ اور اسرائیل کے حملے سے شروع ہونے والی اس جنگ کے نتیجے میں ہزاروں افراد ہلاک ہو چکے ہیں اور آبنائے ہرمز کی بندش سے عالمی منڈی میں تیل کی قیمتیں بھی بڑھی ہیں۔

دوسری جانب اسرائیل اور لبنان کے درمیان امریکی ثالثی میں ہونے والی علیحدہ جنگ بندی کے بعد ایران نے چند گھنٹوں کے لیے آبنائے ہرمز کو عارضی طور پر کھولا ہے۔ ایرانی وزیر خارجہ عباس عراقچی کے مطابق یہ راستہ 10 روزہ جنگ بندی کے دوران تجارتی جہازوں کے لیے کھلا رہے گا، تاہم ایرانی وزارت دفاع کا کہنا ہے کہ امریکہ اور اسرائیل جیسے دشمن ممالک کے فوجی جہازوں پر پابندی برقرار رہے گی۔

اس کے باوجود جہاز رانی کی صورت حال تا حال غیر یقینی ہے کیونکہ امریکی بحریہ نے بارودی سرنگوں کے خطرے سے خبردار کیا ہے۔مذاکرات کے حوالے سے پاکستانی ثالث، آرمی چیف جنرل عاصم منیر بدھ سے تہران میں موجود ہیں۔ ذرائع کے مطابق امریکہ اور ایران کے درمیان اسلام آباد میں براہ راست مذاکرات متوقع ہیں، جس کے نتیجے میں ابتدائی مفاہمت کی یادداشت اور 60 دنوں کے اندر جامع امن معاہدہ طے پا سکتا ہے۔

ایٹمی پروگرام پر اختلافات اب بھی برقرار ہیں۔ ڈونلڈ ٹرمپ کا کہنا ہے کہ امریکہ ایران سے افزودہ یورینیم باہر نکال لے گا، جبکہ ایرانی دفتر خارجہ کے ترجمان اسماعیل بقائی نے اس کی تردید کی ہے۔ ایران اپنے ایٹمی پروگرام کو شہری مقاصد کے لیے قرار دیتا ہے۔ اس دوران عالمی منڈی میں تیل کی قیمتوں میں 10 فی صد کمی دیکھی گئی ہے اور برطانیہ سمیت کئی ممالک نے آبنائے ہرمز میں جہاز رانی کے تحفظ کے لیے بین الاقوامی مشن میں شمولیت پر آمادگی ظاہر کی ہے۔ ایران نے اربوں ڈالر کے منجمد اثاثوں کی بحالی کی امید ظاہر کی ہے، مگر ڈونلڈ ٹرمپ نے اپنے حامیوں سے خطاب میں کسی بھی قسم کی رقم کی ادائیگی کی نفی کی ہے۔