وقت کی پابندی کے لیے ایئرلائنز کی عالمی درجہ بندی: مئی میں سعودیہ ایئرلائن سرِفہرست
یہ کامیابی حج اور عید الاضحیٰ کے سفر کے دوران حاصل ہوئی
سعودی پریس ایجنسی کی بیان کردہ ایوی ایشن اینالٹکس کمپنی سیریم کی رپورٹ کے مطابق سعودی عرب کی قومی سعودیہ ایئرلائن مئی میں روانگی اور آمد کے وقت کی پابندی میں تمام دنیا میں اوّل نمبر پر ہے۔
اس سال ایئرلائن کو یہ دوسرا بڑا آپریشنل اعزاز ملا ہے۔
قبل ازیں سیریم کے مطابق سعودیہ ایئرلائن جنوری 2025 میں آمد کے وقت کے لحاظ سے دنیا میں دوسرے نمبر پر تھی۔
سعودیہ ایئرلائن مملکت کی اولین اور قدیم ترین ایئرلائن ہے جو 1945 میں قائم کی گئی۔
سیریم کی تازہ ترین رپورٹ کے مطابق سعودیہ نے مئی میں بروقت روانگی کی 92.30 فیصد شرح اور بروقت آمد کی 90.12 فیصد شرح پوسٹ کی۔ یہ نتائج چار براعظموں میں 100 سے زیادہ مقامات کے نیٹ ورک پر چلنے والی 13,600 سے زیادہ پروازوں پر مبنی تھے۔
یہ کارکردگی حج اور عید الاضحیٰ کی تعطیلات کے دوران سامنے آئی جو سال کا ایک مصروف ترین وقت ہوتا ہے۔
ایس پی اے کی رپورٹ کے مطابق ایئرلائن نے اعلیٰ آپریشنل کارکردگی کے معیارات پر پورا اترتے ہوئے حج اور عید الاضحیٰ میں طے شدہ آپریشنز انجام دیے۔
تازہ ترین درجہ بندی 2025 کی مضبوط کارکردگی پر مبنی ہے جب سعودیہ نے 202,800 سے زیادہ پروازوں میں 86.53 فیصد کی بروقت آمد کی شرح ریکارڈ کی۔
سعودیہ ایئرلائن نے سعودیہ گروپ میں ہم آہنگی، جدید فلائٹ مینجمنٹ سسٹم اور آپریشنل منصوبہ بندی و کارکردگی میں سرمایہ کاری کو اپنی اعلیٰ آپریشنل کارکردگی کی بنیاد قرار دیا۔
ایئرلائن کا موجودہ بیڑہ 149 طیاروں پر مشتمل ہے۔ یہ آئندہ سالوں میں اہم توسیع کی تیاری کر رہی ہے اور اس کے بیڑے میں 116 طیارے شامل ہونے والے ہیں۔ یہ نمو پروازوں کے بہتر تعدد، بیٹھنے کی وسیع تر گنجائش اور نئے بین الاقوامی مقامات کے آغاز میں معاون ثابت ہو گی۔
ہوابازی کے علاوہ سعودیہ نے سعودی عرب کے سیاحتی عزائم کی حمایت میں بڑھتا ہوا کردار ادا کیا ہے۔ سعودی ٹورازم اتھارٹی کے ساتھ شراکت میں ایئرلائن نے 2025 میں 24 ممالک سے تقریباً 27 ملین سیاحوں اور زائرین کی آمد میں مدد کی اور اپنے بین الاقوامی روٹ نیٹ ورک کے ذریعے مملکت کے لیے تشہیر کا کام کیا۔
سعودیہ نے کہا ہے کہ وقت کی پابندی مسافروں کے سفری تجربے کا ایک مرکزی جز ہے کیونکہ اس سے عالمی سطح پر مملکت کی موجودگی کو فروغ ملا ہے اور 2030 تک سالانہ 150 ملین زائرین اور مسافروں کو راغب کرنے کا جو ہدف مملکت نے مقرر کیا ہے، یہ اس میں معاونت کرتا ہے۔
