اسحاق ڈار کاامریکہ-ایران امن معاہدےمیں پیش رفت پرسعودی،ترک ہم منصبوں سےتبادلہ خیال

پاکستان کے وزیرِ خارجہ اسحاق ڈار نے اس ہفتے سعودی عرب، سوئٹزرلینڈ اور ترکیہ کے ہم منصبوں سے امریکہ-ایران معاہدے میں پیش رفت پر تبادلۂ خیال کیا، وزارتِ خارجہ نے معاہدہ طے پا جانے کی امید کا اظہار کرتے ہوئے اتوار کو کہا۔

امریکی صدر ڈونلڈ ٹرمپ اور وزیرِ اعظم شہباز شریف دونوں کو توقع ہے کہ امریکہ اور ایران کے درمیان طویل عرصے سے جاری امن معاہدے پر آج دستخط ہو جائیں گے۔ تاہم ایران نے اتوار کو معاہدے پر دستخط کرنے سے انکار کرتے ہوئے کہا ہے کہ اس کے بجائے "آئندہ دنوں میں" معاہدہ ہو سکتا ہے۔

ڈار نے ہفتے کے روز ترکیہ کے وزیرِ خارجہ خاقان فیدان سے بدلتی ہوئی علاقائی صورتِ حال پر بات کی۔ پاکستانی وزارتِ خارجہ نے کہا کہ دونوں نے امریکہ اور ایران کے درمیان مفاہمت کی طرف "حوصلہ افزا پیش رفت" کا خیرمقدم کیا۔

پاکستانی وزارتِ خارجہ نے کہا، "انہوں نے امید ظاہر کی کہ یہ مثبت پیش رفت خطے میں دیرپا امن و استحکام کی راہ ہموار کرے گی۔"

ڈار نے ہفتے کے روز سعودی وزیرِ خارجہ شہزادہ فیصل بن فرحان سے بھی بات کی۔ دونوں نے اس بات کا خیرمقدم کیا کہ امریکہ ایران مذاکرات اپنے آخری مرحلے میں ہیں۔

وزارت خارجہ نے کہا، "سعودی وزیرِ خارجہ نے پورے عمل میں ثالثی اور مذاکرات کی حمایت میں پاکستان کی مسلسل اور مستقل کوششوں کو سراہا۔"

ڈار نے ہفتے کے روز سوئس وزیرِ خارجہ اگنازیو کیسس اور مصری وزیرِ خارجہ ڈاکٹر بدر عبدالعاطی سے بھی الگ الگ فون کالز میں امریکہ-ایران امن معاہدے میں پیش رفت پر تبادلۂ خیال کیا۔ دفتر خارجہ نے کہا کہ تینوں نے علاقائی پیش رفت پر قریبی رابطے میں رہنے پر اتفاق کیا۔