یمن: حوثی گروپ کے زیر کنٹرول کیمپ میں پناہ گزین خاتون بھوک سے جاں بحق

شمالی یمن میں حوثی گروپ کے زیر کنٹرول صوبہ حجہ کے ضلع عبس کے ایک کیمپ میں ایک پناہ گزین خاتون شدید بھوک اور طبی نگہداشت کی کمی کے باعث دم توڑ گئی۔ مقامی کارکنوں اور صحافیوں نے بتایا چند ہفتے قبل انہی وجوہات کی بنا پر خاتون کے بوڑھے شوہر کا انتقال ہوا تھا۔ ذرائع نے بتایا کہ آنجہانی پناہ گزین عبداللہ مستبانی (ابو ہاشم) - جو مئی کے وسط میں شدید غذائی قلت کے باعث انتقال کر گئے تھے - کی اہلیہ کیمپ کے اندر اپنی صحت کی حالت بگڑنے کے بعد اپنے شوہر سے جا ملیں کیونکہ کارکنوں کی طرف سے انہیں بنیادی خوراک اور ادویات فراہم کرنے کی اپیلیں ناکام ہو گئی تھیں۔

یہ واقعہ صوبہ حجہ کے پناہ گزین کیمپوں میں انسانی ہمدردی کی بگڑتی ہوئی صورتحال کی عکاسی کر رہا ہے۔ حوثیوں کے زیر کنٹرول علاقوں میں زیادہ تر بین الاقوامی اور مقامی غذائی اور امدادی پروگراموں میں شدید کٹوتی اور بندش کے باعث ہزاروں پناہ گزینوں کو فاقہ کشی کے بھوت کا سامنا ہے۔ امدادی شعبے میں اقوام متحدہ اور غیر سرکاری تنظیموں کے مقامی اور بین الاقوامی ملازمین کی حوثیوں کی طرف سے گرفتاریوں کی لہر کے بعد مہینوں سے بنیادی پروگرام معطل ہیں۔ اس صورت حال نے ہزاروں پناہ گزین خاندانوں کو زندگی بچانے والی اشیائے خورونوش کی سپلائی سے محروم کر دیا ہے۔