1974 ورلڈ کپ فائنل برازیل کی امیدیں بارش میں ڈوب گئیں

1974 میں مغربی جرمنی نے فٹبال ورلڈ کپ کا دسواں ایڈیشن میزبانی کے طور پر منعقد کیا۔ اس سے پہلے مغربی جرمنی اور اسپین کے درمیان 1974 ورلڈ کپ کی میزبانی کے لیے سخت مقابلہ جاری تھا۔

آخرکار دونوں ممالک کے درمیان ایک معاہدہ طے پایا ،جس کے تحت اسپین نے اس دوڑ سے دستبرداری اختیار کر لی اور بدلے میں اسے 1982 ورلڈ کپ کی میزبانی دی گئی۔

اس ٹورنامنٹ میں 5 کنفیڈریشنز سے تعلق رکھنے والی 16 ٹیموں نے حصہ لیا۔ یہ پہلا موقع تھا کہ ہیٹی، زائیر (موجودہ جمہوریہ کانگو)، مشرقی جرمنی اور آسٹریلیا نے ورلڈ کپ میں شرکت کی۔

یہ ایڈیشن کئی دلچسپ واقعات اور غیر معمولی لمحات کا حامل رہا، جہاں شائقین کو میدان اور اس کے باہر کئی حیران کن مناظر دیکھنے کو ملے۔

مغربی جرمنی اور مشرقی جرمنی کے درمیان مقابلہ

گروپ مرحلے میں میزبان مغربی جرمنی کو اپنے ہی ہمسایہ ملک مشرقی جرمنی کے ساتھ ایک ہی گروپ میں رکھا گیا۔ اس اہم اور غیر معمولی مقابلے میں مشرقی جرمنی نے مغربی جرمنی کو 0-1 سے شکست دے دی۔

پہلے مرحلے کے اختتام پر دونوں ٹیموں نے اگلے راؤنڈ کے لیے کوالیفائی کر لیا۔ مشرقی جرمنی گروپ میں پہلے نمبر پر رہا جبکہ مغربی جرمنی دوسرے نمبر پر رہا، جس کے نتیجے میں مغربی جرمنی کو دوسرے مرحلے میں نسبتاً آسان حریفوں کا سامنا کرنا پڑا۔

زائیر کی شرکت

دوسری جانب زائیر کی ٹیم کو اپنے پہلے ہی ورلڈ کپ میں شدید مشکلات کا سامنا کرنا پڑا۔ ٹیم نے اپنے تینوں میچز میں شکست کھائی، جن میں یوگوسلاویہ کے خلاف 0-9 کی بڑی ہزیمت بھی شامل تھی۔

برازیل کے خلاف میچ میں بھی زائیر کو 0-3 سے شکست کا سامنا کرنا پڑا۔اسی مقابلے کے دوران ایک دلچسپ اور حیران کن واقعہ بھی پیش آیا۔ جب برازیل کو ایک فری کک ملی تو زائیر کے کھلاڑی اور مازمبے کلب سے تعلق رکھنے والے ایلونگا موئیبو (Ilunga Mwepu) نے اچانک دیوارِ دفاع سے آگے بڑھ کر گیند کو لات مار دی۔ بعد میں اسی کھلاڑی نے دوبارہ اسی طرح گیند کو روکنے کی کوشش کی، جس پر اسے پیلا کارڈ دکھایا گیا۔

کچھ لوگوں کے مطابق زائیر کے کھلاڑیوں کے اس غیر معمولی رویے کی وجہ کھیل کے قوانین کی مکمل سمجھ نہ ہونا تھا، تاہم اس دعوے پر بعد میں کافی اختلاف رائے سامنے آیا۔

غیر معمولی فائنل اور نئی ٹرافی

پچھلے ورلڈ کپ کے برعکس اس بار سیمی فائنل کا مرحلہ موجود نہیں تھا۔ پہلے راؤنڈ کے بعد ٹیموں کو دو گروپس میں تقسیم کیا گیا۔ گروپس کے سرفہرست دونوں ٹیمیں فائنل میں پہنچیں، جبکہ دوسرے نمبر پر آنے والی ٹیمیں تیسری پوزیشن کے لیے مقابلہ کھیلیں۔تیسری پوزیشن کے میچ میں برازیل اور پولینڈ آمنے سامنے آئے۔ اس میچ کے دوران شدید بارش ہوئی اور پولینڈ نے برازیل کو 0-1 سے شکست دی۔

برازیل نے بعد میں شکست کا ایک بڑا سبب خراب موسم کو قرار دیا۔فائنل ایک منفرد مقابلہ تھا جو ہالینڈ اور مغربی جرمنی کے درمیان کھیلا گیا۔ میچ کے آغاز میں ہی ہالینڈ کو پنالٹی ملی جس پر اس نے برتری حاصل کر لی۔

تاہم جرمنی نے بھی پنالٹی کے ذریعے مقابلہ برابر کیا اور پھر گیرڈ مولر نے 43ویں منٹ میں فیصلہ کن گول کر کے جرمنی کو برتری دلا دی۔

اسی ورلڈ کپ میں نئی ٹرافی کا آغاز بھی ہوا، جو پرانی جول رِیمے ٹرافی کی جگہ متعارف کرائی گئی۔ پرانی ٹرافی برازیل نے مستقل طور پر اپنے نام کر لی تھی، کیونکہ انہوں نے اسے تین بار جیت لیا تھا۔