نیشنل الائنس کا اہم عہدوں پر امیدوار فائنل کرنے کا مطالبہ

عراق کے سب سے بڑے پارلیمانی اتحاد نیشنل الائنس کی قیادت نے صدر، وزیر اعظم اور اسپیکر کے ناموں کا جلد از جلد فیصلہ کرنے کی ضرورت پر زور دیا ہے تاکہ قومی وحدت کو برقرار رکھا جا سکے۔

اس امر کا اعلان الائنس کے اجلاس کے بعد جاری ہونے والے بیان میں کیا گیا۔ اس اتحاد میں ایوان کے اندر موجود سیاسی جماعتوں کی بڑی اکثریت شامل ہے، جن میں ایاد علاوی کی جماعت بھی شامل ہے۔

وزیر اعظم کے نام پر اختلافات کی وجہ سے اس عہدے کے لیے کسی فرد کے نام پر اتفاق نہیں ہو سکا۔

ادھر وزیر اعظم نوری المالکی نے کہا ہے کہ وہ مسلسل تیسری مرتبہ بھی وزارت عظمی کی امیدواری سے کسی قیمت پر دست بردار نہیں ہوں گے۔

ادھر مدت ختم ہونے والی اسمبلی کے اسپیکر اسامہ النجیفی نے نئے ایوان میں اسپیکرشپ کی دوڑ میں خود کو شامل نہ کرنے کا فیصلہ کیا ہے۔ اس اقدام کا مقصد نوری المالکی کو بھی وزارت عظمی کی دوڑ میں شامل نہ ہونے پر آمادہ کرنا تھا۔