سعودی محکمہ انسداد انتہا پسندی نے نیا ٹویٹر اکاؤنٹ متعارف کرا دیا

سعودی عرب میں انتہا پسندی کے انسداد کے محکمے نے ٹویٹر پر اپنا نیا اکاؤنٹ متعارف کروایا ہے۔ اس موقع پر شدت پسندی اور سخت گیری کے حوالے سے سعودی فرماں روا شاہ سلمان کی گفتگو پر مشتمل ٹوئیٹ جاری کی گئی ہے۔

خادم حرمین شریفین کے مطابق "سعودیوں کے بیچ شدت پسندوں کی کوئی جگہ نہیں ہے جو اپنے مقاصد پورے کرنے کے لیے رواداری پر مبنی عقیدے سے ناجائز فائدہ اٹھائیں۔ معاشرے میں ایسے عناصر کی بھی کوئی گنجائش نہیں جو شدت پسندی کے خلاف ہماری جنگ کو مملکت میں فتنہ اور فساد پھیلانے کا ذریعہ بنا لیں"۔

محکمے نے شدت پسندی کے حوالے سے سعودی ولی عہد شہزادہ محمد بن سلمان کی بھی ایک ٹویٹ جاری کی ہے۔ اس ٹویٹ میں بن سلمان نے باور کرایا کہ عنقریب شدت پسندی پر قابو پا لیا جائے گا۔

ولی عہد کے مطابق انتہا پسندی کا خاتمہ سعودیوں کے لیے کوئی چیلنج نہیں ہے کیوں کہ وہ رواداری کی درست اور معتدل اقدار کے حامل ہیں۔ بن سلمان کا کہنا ہے کہ "شدت پسندی کے حوالے سے درپیش حالات میں حق ہمارے ساتھ ہے"۔