.

بغداد میں امریکی سفارت خانہ کے نزدیک واقع چوک اور بلد ائیربیس پر راکٹ باری

پہلی اشاعت: آخری اپ ڈیٹ:

عراق کے دارالحکومت بغداد میں امریکی سفارت خانے کے نزدیک واقع ایک چوک میں کاتیوشا راکٹ گرنے کے بعد دھماکے کی آواز سنی گئی ہے لیکن اس سے کوئی جانی نقصان نہیں ہوا ہے۔

امریکی سفارت خانہ بغداد کے انتہائی سکیورٹی والے گرین زون میں واقع ہے۔اسی علاقے میں غیر ملکی سفارت خانے،عراقی حکومت کے دفاتر اور پارلیمان کی عمارت واقع ہے۔

ادھر بغداد سے 80 کلومیٹر شمال میں واقع بلد ائیربیس میں دو کاتیوشا راکٹ گرے ہیں۔اس ہوائی اڈے پر امریکی فوجی تعینات ہیں۔عراق کے دو سکیورٹی ذرائع نے بتایا ہے کہ ان راکٹوں سے کوئی جانی نقصان نہیں ہوا ہے۔

یہ راکٹ باری بغداد میں سپاہِ پاسداران انقلاب ایران کی القدس فورس کے کمانڈر قاسم سلیمانی کی امریکا کے فضائی حملے میں ہلاکت کے ایک روز بعد کی گئی ہے۔فوری طور پر کسی گروپ نے اس راکٹ حملے کی ذمے داری قبول نہیں کی ہے۔