متحدہ عرب امارات کی مسلح افواج کے ڈپٹی سپریم کمانڈر اور ابوظبی کے ولی عہد شیخ محمدبن زاید آل نہیان نے قاہرہ میں مصرکے صدر عبدالفتاح السیسی سے ملاقات کی ہے۔ انھوں نے دوطرفہ تعلقات اور مشرقِ اوسط میں امن واستحکام سے متعلق امور پر تبادلہ خیال کیا ہے۔
شیخ محمد نے ایک ٹویٹ میں بتایا ہے کہ انھوں نے مصر اور یو اے ای کے درمیان دوطرفہ تعلقات کو مضبوط بنانے کے طریقوں اور مختلف شعبوں میں تعاون کے فروغ کے بارے میں بات چیت کی ہے۔
انھوں نے ٹویٹ میں مزید لکھاہے کہ ’’ہم نے خطےمیں امن اور استحکام سے متعلق امور کے بارے میں بھی غورکیا ہے۔‘‘
شیخ محمد نے حال ہی میں مصر کے ہمسایہ ملک اسرائیل کے ساتھ معمول کے تعلقات استوار کرنے کے لیے امن معاہدہ طے کرنے میں کلیدی کردار ادا کیا ہے۔دونوں ملکوں نے ستمبر میں وائٹ ہاؤس میں امن معاہدے پر دست خط کیے تھے۔
اس کے بعد سے دونوں ملکوں نے مختلف شعبوں میں دو طرفہ تعاون کے متعدد سمجھوتوں پر دست خط کیے ہیں اور ان کے درمیان تجارتی پروازیں شروع ہوچکی ہیں۔یو اے ای مصر اور اردن کے بعد اسرائیل سے تعلقات قائم کرنے والا تیسرا ملک تھا۔اس کے بعد بحرین نے بھی صہیونی ریاست سے تعلقات استوار کرلیے تھے۔
دو اور عرب ملک سوڈان اور مراکش بھی امریکی صدر ڈونلڈ ٹرمپ کی ثالثی میں اسرائیل سے تعلقات استوار کرنے کا اعلان کرچکے ہیں۔تاہم ان کے درمیان ابھی امن معاہدوں پر دست خط نہیں ہوئے ہیں۔
