سعودی ہلال احمر نے دل کی حرکت بند ہونے والی مصری معتمرہ کی جان بچا لی

مکہ مکرمہ میں سعودی ہلال احمر اتھارٹی سے منسلک ایمبولینس ٹیموں نے مسجد حرام میں عمرہ کرنے والی ایک مصری معمترہ کے دل کی حرکت بند ہونے پر اسے فوری طبی امداد فراہم کر کے اس کی زندگی بچا لی۔

مکہ المکرمہ ریجن میں سعودی ہلال احمر اتھارٹی برانچ کے ڈائریکٹر جنرل ڈاکٹر مصطفی بلجون نے بتایا کہ ہلال احمر میں موجود طبی مشن پر مامور کمانڈ اینڈ کنٹرول روم کو ہفتہ کی شام ساڑھے چھ بجے ایک کال موصول ہوئی جس میں اطلاع دی گئی کہ حرم مکی کے مشرقی صحن میں "خواتین کی جائے نماز "میں ایک خاتون حرکت قلب بند ہونے کی وجہ سے بیہوش ہو گئی ہیں۔

ڈاکٹر مصطفی بلجون کے مطابق میڈیکل ٹیم کے آمد پر ایک ساٹھ سالہ خاتون زمین پر لیٹی ہوئی تھیں۔

ایمبولینس ٹیم نے، ڈاکٹر مصطفی کے مطابق، ایسے حالات کے لیے پہلے سے طے کردہ طریقہ کار کے مطابق فوری طور پر مداخلت کی۔ خاتون کو طبی امداد فراہم کی گئی جس کے بعد انہیں ہوش آنے پر ہسپتال منتقل کر دیا گیا ہے جہاں وہ انتہائی نگہداشت وارڈ میں زیر علاج ہیں۔