آج عازمین حج کی پہلی پرواز کی سعودی عرب آمد، تیاریوں کی کچھ تفصیل

اس سال حج کے لیے عازمین کی پہلی پرواز کے سعودی عرب میں استقبال کی تیاریاں کی گئی ہیں۔ سعودی ائر لائنز گروپ کے مطابق اتوار 21 مئی کو مدینہ منورہ کے بین الاقوامی شہزادہ محمد بن عبد العزیز ایئرپورٹ پر عازمین حج کی پہلی پرواز کی آمد ہو رہی ہے۔

سعودی ٹرانسپورٹ اور لاجسٹکس سسٹم نے بھی عازمین کے استقبال کی اپنی تیاری مکمل کر لی ہے۔ آپریشنل پلانز کی تیاری کرلی گئی ہے۔ تکنیکی اور خصوصی کیڈرز نے عازمین حج کی آمد کو محفوظ اور آسان بنانے کے لیے اقدامات کیے ہیں۔ سعودی ٹرانسپورٹ اور لاجسٹکس سسٹم نے عازمین حج کی سعودی عرب میں آمد کے بعد سے مختلف فضائی، زمینی، سمندری اور ریل کے شعبوں میں سے گزرنے اور مناسک ادا کرنے اور اپنے ملکوں کو واپس جانے تک کے مراحل کے حوالے سے انتظامات کیے ہیں۔

سعودی عرب میں کی جانے والی تیاریوں کا جائزہ لیں تو تقریباً 7 ہزار 700 پروازوں کے ذریعے عازمین حج کی آمد اور روانگی کے دو مراحل کو مکمل کیا جائے گا۔ پروازوں میں تقریباً 1.7 ملین سیٹیں عازمین کے لیے مختص کی گئی ہیں۔ یہ پروازیں سعودی عرب کے 6 ہوائی اڈوں پر اتریں گی۔ جدہ میں کنگ عبدالعزیز ایئرپورٹ، مدینہ منورہ میں شہزادہ محمد بن عبدالعزیز ایئرپورٹ، طائف انٹرنیشنل ایئرپورٹ، ینبع میں پرنس عبدالمحسن ایئرپورٹ، ریاض میں کنگ خالد ایئرپورٹ اور دمام میں کنگ فہد ایئرپورٹ پرعازمین کی آمد ہوگی۔

جنرل اتھارٹی برائے روڈز قومی سڑکوں کے نیٹ ورک کی نگرانی کر رہی اور انہیں ریگولیٹ کر رہی ہے۔ اتھارٹی نے سرحدی گزرگاہوں سے مقدس مقامات تک 13 ہزار کلومیٹر سے زیادہ کا سروے کیا ہے۔

اتھارٹی نے 24 ہزار بسیں اور 120 سے زیادہ فیلڈ مانیٹر تیار کیے ہیں جو مکہ اور مدینہ کے مقدس شہروں کے داخلی راستوں پر کام کریں گے۔ اس طرح زمینی، سمندری اور ریل کی نقل و حمل کی سرگرمیوں میں جدید ٹرانسپورٹ ٹیکنالوجیز کے ساتھ لائسنس یافتہ سہولیات کی تعمیل کو یقینی بنایا گیا ہے۔