مغربی کنارے میں اسرائیلی فضائی حملے میں حماس کمانڈر سمیت پانچ افراد قتل

حماس میڈیا کے مطابق ہفتے کے روز مقبوضہ مغربی کنارے میں ایک گاڑی پر اسرائیلی فضائی حملے میں حماس کا ایک کمانڈر ہلاک ہو گیا۔ اس کے برعکس فلسطینی خبر رساں ایجنسی وفا نے بتایا کہ چار دیگر افراد بھی مارے گئے۔

صحت کے حکام کے حوالے سے دی گئی وفا کی رپورٹ کے مطابق دیگر کی شناخت واضح نہیں تھی۔

اسرائیلی فوج نے کہا ہے کہ اس نے مغربی کنارے کے شہر طولکرم کے ارد گرد مزاحمت کاروں کے ایک سیل پر فضائی حملہ کیا تھا۔ حماس میڈیا نے کہا کہ مزاحمت کاروں کو لے جانے والی ایک گاڑی نشانہ بنی اور طولکرم بریگیڈ کا ایک کمانڈر مارا گیا۔

بیروت میں اسرائیلی حملے میں حزب اللہ کے سینیئر فوجی کمانڈر فواد شکر کی ہلاکت کے ایک دن بعد اسی ہفتے بدھ کے روز تہران میں حماس کے رہنما اسماعیل ہنیہ کو قتل کر دیا گیا جس سے خطے میں کشیدگی عروج پر جا پہنچی ہے۔

ہنیہ کی موت حماس کی سینیئر شخصیات کی ہلاکتوں کے سلسلے میں سے ایک تھی جبکہ غزہ میں جنگ 11ویں مہینے کے قریب پہنچ رہی ہے اور یہ تشویش بڑھتی جا رہی ہے کہ یہ تنازع پورے شرقِ اوسط میں پھیل رہا ہے۔

حماس اور ایران دونوں نے اسرائیل پر ہنیہ کے قتل کا الزام لگایا اور اپنے دشمن کے خلاف جوابی کارروائی کرنے کا عہد کیا ہے۔ اسرائیل نے اس ہلاکت کی نہ تو ذمہ داری قبول کی ہے اور نہ ہی تردید کی ہے۔

حماس کی طرح حزب اللہ کو بھی ایران کی حمایت حاصل ہے اور اس نے بھی انتقام کا عزم کیا ہے۔